Foto: Aqtóbe oblysy ákimdiginiń baspasóz qyzmeti
Atalǵan shara sheńberinde qar shyǵarý, arnalardy tazartý, ınertti materıaldardy daıyndaý, jadynamalar taratý jáne basqa da jumystar atqarylyp jatyr. Tótenshe jaǵdaılarda áreket etý úshin 2 454 adam, 866 tehnıka birligi jáne arnaıy qaıyqtar daıyndalǵan.
Aqtóbe qalasynyń ákimi Azamat Bekettiń aıtýynsha qaladaǵy qardy shyǵarýǵa 310 júk kóligi jumyldyrylyp, 255 myń tekshe metr qar shyǵarylǵan. «Qazgıdromet» oblystyq fılıalynyń dırektory Aıgúl Saımovanyń habarlaýynsha, naýryzdyń 1-5 kúnderi Aqtóbe qalasynda 13,6 mm qar túsken. 9 naýryzǵa deıin qalada taǵy qardyń jaýýy kútilip otyr. Sondaı-aq Áıteke bı, Baıǵanın, Mártók, Muǵaljar, Yrǵyz, Hromtaý jáne basqa da aýdandarda mólsherden kóp qar jaýǵan.
«Qazsýshar» oblystyq fılıaly dırektorynyń orynbasary Tımýr Tleýovtyń málimetinshe, sý qoımalaryndaǵy jaǵdaı ázirge turaqty. 280 mln tekshe metrge deıin sý jınaıtyn Qarǵaly sý qoımasynda búginde 81 mln tekshe metr sý bar. Aqtóbe sý qoımasynda 183 mln, al Sazdy sý qoımasynda 5 mln tekshe metr bos oryn saqtalǵan.
«Qardyń kólemi óte kóp, ony sý tasqyny bastalǵanǵa deıin shyǵaryp úlgerýimiz kerek, oǵan óndiristik kásiporyndardyń tehnıkalaryn tartýymyz qajet. Muzdyń erýin baqylaý da mańyzdy. Jaǵdaıdy kúndelikti baqylap, qajet bolǵan jaǵdaıda qosymsha sharalar qabyldaımyz. Árbir jaýapty tulǵa óz mindetin ýaqytyly oryndaý, azamattardyń qaýipsizdigi úshin jaýap beredi», dep túıindedi oblys ákimi.
