Samal ESLIаMOVA: Skrıpka sazy ómirimdi ózgertti

Aktrısa aıtady: – О́ner jo­lyna túsip, aktrısa atanýym – taǵ­dyrdyń maǵan buıyrtqan teńdessiz tartýy. Sebebi ártis bolamyn degen oı úsh uıyqtasam da sanama kirip shyqpaǵan eken, senesiz be, tipti bul salaǵa qyzyqpappyn da. Bala kúnimnen armandap, kóńil túk­pirinde qasterlegen eń izgi tile­gim – jýrnalıst bolý edi. Biraq dál oqýǵa tapsyrǵan jyly balym jetpeı qalyp, jýrnalıstı­ka mamandyǵyna túse almadym. Oǵan ákem ishteı qýanǵan sııaqty. Jýrnalıst bolýy­ma qarsylyq tanytpaǵanymen, túpki oıy meniń óner adamy bolǵanymdy qalasa kerek. Ájem kezinde ándi óte jaqsy aıtqan eken. Ákem de ónerden qur alaqan emes, dombyranyń qulaǵynda oınaıdy. Tipti kezinde óner jolyn tańdaǵysy kelipti. Biraq aǵasy aýyryp, ile ájemiz qaıtys bolyp, kásibı bilim alýǵa múmkindigi bolmaı, dombyrany óz betimen úırengen. О́zi jet­pegen jetistikti balalarynyń baǵyn­dyrǵanyn qalaǵan shyǵar, bizdiń óner salasyna barýymyzǵa esh qarsy bolmady. Kerisinshe únemi qoldap, qolpashtap otyrdy. Máselen, týǵan ápkem – kásibı syrnaıshy. Al meniń aktrısa bolýy­m aıaqastynan sheshilgen sáttilik desem bolady. Oqýǵa túse almaı áke­miz ekeýmiz kóshe boılap kele ja­tyr edik, kenet ǵımarattyń ashyq turǵan terezesinen syzyl­ta shyqqan skrıpkanyń úni eriksiz eleń etkizdi. Ásem áýenge elitip uzaqtaý turyp qalsam kerek, ákem «Ishine kirip kóresiń be?» dep surady. Imene basyp ǵımaratty betke aldyq. Bul – Petropavl qalasyndaǵy О́ner kolledji edi. Oqý týraly aqparat surastyryp kórip edik, qujat qabyldaý áldeqashan aıaqtalyp ket­ken eken. Tek Soltústik Qazaq­stan oblystyq teatry janynan ashyl­ǵan «Eksperımenttik teat­r ak­teri» kýrsynyń emtıhany ǵana qalǵandyǵyn, onyń ózi erteń aıaq­talatyndyǵyn aıtty. Muny estigen ákemniń kózi ottaı janyp: «Ba­ǵyń­­dy synap kór, qyzym» dep jiger­lendirdi. Men bolsam, erteń­gi emtıhanǵa úlgermeıtinimdi syltaýratyp ákemdi aınytýǵa tyrys­tym. Shynymdy aıtaıyn, ózimdi ártis retinde tipti eles­tete de alǵan joqpyn. Aktrı­salardyń boıy uzyn, tal boıynda bir mini bolmaıtyndaı kórinetin. Oǵan qosa olar tek Máskeý men Almatyda oqyp, daıar­lanýy kerekteı seziletin. Biraq olaı emes eken. Sodan ne kerek, uzaq sozbaqtaýǵa ýaqyt bol­mady, ákemniń de ti­legin jerge tastaǵym kelmeı, akter mamandyǵyn oqytatyn kýrsqa qujat tapsyrdym. Oılamaǵan jerden О́ner kolled­jiniń stýdenti atandym. Osylaısha, skrıpka sazy ómirimdi ózgertti.

Men oıladym: Áke tilegi qabyl bolyp, ónerdiń óz ortasyna top ete qalǵan boıjetken boıyndaǵy talanty men alǵyrlyǵynyń arqa­synda ortasynda tez moıyndal­dy. Kamera súıetin súıkimdi júzi men qaraǵan jandy beıjaı qal­dyr­maıtyn ol ótkir kózqaras alys­taǵy Almatyda júrgen rejıs­ser Sergeı Dvorsevoıdyń kóńi­l­ine de qozǵaý saldy. Sezim­tal sý­ret­kerdiń ishki túısigi túsir­geli júrgen jańa týyndysyna bas­ty keıipkerdi tapqanyn birden túsindi. Kóp oılanbastan qııandaǵy Qyzyljarǵa shaqyrý jiberip te úlgerdi. Tosynnan soǵylǵan qońy­­raýdy kóterip, tutqanyń arǵy jaǵynan estilgen usynysqa qape­limde ne derin bilmeı abdy­rap-aq qalǵanymen, bolashaq aktrı­saǵa áldeqandaı túsiniksiz kúsh rýh bergendeı: «Almatyǵa bara­myn!» dep senimdi ún qatty. Osy­laısha, erteńinde Alataýdyń baýyryna taban tıgizgen Samal fılm irikteýine qatysyp, kastıngten súrinbeı ótti. «Qyzǵaldaq» («Tıýlpan») fılminiń basty róline bekitilgenine tipti ózi de sene almaǵan dál sol sátte. Biraq rejısserdiń: «Seniń qolyńnan bári keledi. Men saǵan senemin» de­gen bir-aq aýyz sózi senimine qa­nat baılaǵandaı edi. Alaıda ol osy sheshiminiń araǵa birneshe jyl sa­lyp ómirin túbegeıli ózger­tetinin, al óziniń tipti armandap ta kórmegen dańq bıigine shyǵatynyn sezbegen de edi.

Aktrısa aıtady: – О́mir degen qyzyq qoı, onyń pendesine usynar tosynsyıy da taýsylmaıdy eken. Áıtpese, dál sol sátte syzyla oınaǵan skrıpkanyń syrshyl úni meni tipti armandap ta kórmegen óner álemine alyp keledi dep oıladym ba? Sol ózim ógeısingen óner­ge tabaldyryǵyn attaǵan sátten-aq ólerdeı ǵashyq bolatynymdy tipti de sezbedim ǵoı. Al taǵdyrdyń rejısser Sergeı Dvorsevoımen jolyqtyrǵan teńdessiz tartýyn aıtsańyzshy! Munyń barlyǵyn jaı ǵana kezdeısoqtyq dep aıta alamyz ba? «Qyzǵaldaq» fılmine tańdalǵanda túsirilim tobyndaǵy kópshilik maǵan senim­sizdik tanytty. «Áli tájirıbesi de joq jap-jas qyz eki balanyń anasyn nanymdy jetkize ala ma, onyń ústine Soltústiktiń qyzy eken, tili men tanymy naǵyz qaza­qy keıipker bolmysyn asha ala ma?» degen san saýaldyń da maza bermegenin olardyń janarynan sezdim. Basynda sol úshin de qınalǵanymdy jasyrmaımyn. Alaıda rejısserdiń maǵan artqan senimi bárin de jeńip shyqty. Osylaısha, kıno álemindegi debıýtim «Qyzǵaldaqqa» bekitildim. Keıin kartına Kann kınofestıvaliniń «Erekshe kózqaras» atalymy boıynsha bas júldesin jeńip aldy.

Shyntýaıtyna kelgende, el oı­laǵandaı aýyl tirligine sonsha­lyqty ebedeısiz emes edim. Ras, Soltústik Qazaqstan oblysyn eldiń bári orystanyp ketken óńir dep qaraıtyn jalpy túsinik qalyp­tasqan. Múmkin ol qalalyq jerlerge nemese oblys ortalyǵyna qatysty aıtylǵan shyǵar. Biraq men Soltústik Qazaqstan oblysy, Aqqaıyń aýdanynyń Aralaǵash deıtin aıadaı ǵana qazaqy aýylynda týyp-óstim. Ata-anam da taza ulttyq tanym, tárbıedegi adamdar. Sondyqtan da biz aqsaýsaq bo­lyp ósken joqpyz, kerisinshe atqa minip, mal qaıyryp naǵyz qaza­qy aýyldyń rýhy men tynys-tirshiligin sezip ósken qyzbyn. Ákem de uly bolmaǵan soń, meni er balasha tárbıelep, dalanyń tirligine ıkemdedi. Bir sózben aıtqanda, ákeme qolǵanat boldym. Mal baǵý, otyn daıyndaý degen ju­mys tikeleı meniń mindetime kire­tin. Al ápkem úıdiń sharýasyna jaqyn boldy. Bala kezdegi oshaq­tyń otyna qyzara pisken qara qazandaǵy baýyrsaqtyń dá­min aıtsańyzshy! Onyń bári – ómi­rimniń sanadan óshpeıtin bólshegi, umytylmaıtyn aıaýly este­likteri. Sol sebepti «Qyzǵal­daq» fılmindegi vaıbty men el oılaǵandaı jatyrqaǵan joqpyn. Kerisinshe, aýyldaǵy ózim bala kezimde kúndelikti istep kelgen úırenshikti ómir qalybyndaı qabyldadym.

Men oıladym: «Qyzǵaldaq» fılminen bastalǵan shyǵarma­shylyq tandem rejısser men aktrı­sany jáne bir jańa kartına­nyń túsirilim alańynda qaıta qaýyshtyrdy. Ol – qazaqtyń qarlyǵashtaı qaragóz qyzyn áıgi­li Kann kınofestıvaliniń tórine alyp shyǵyp, ataǵyn jer júzine jaıyp, bir-aq sátte juldyz atan­dyrǵan «Aıka» fılmi bolatyn. Sergeı Dvor­sevoıdyń kóregendigi sol, áli eshbir jerde ózin dáleldep, talantyn tanytyp kórmegen, ónerdegi ómirbaıany aq paraqtaı aktrısanyń boıynan tasada jasyrynǵan darynyn der kezinde kóre bilip, onyń bar múmkindiginiń túsirilim alańynda jan-jaqty ashylýyna jaǵdaı jasaýy der edik. Ony rejısserdiń ózi de bizge erterekte bergen suhbattarynyń birinde aǵynan aqtaryla aıtyp bergen bolatyn: «Akterge týa bitti talanttan bólek, minez de qajet. Samal­dyń boıynda qolǵa alǵan isin sońy­na jetkizbeı tynbaıtyn qaısar da ójet minez bar. Syrttaı óte ná­zik kóringenimen, ishki qýaty myq­ty. Ol jarq-jurqty basty plan­ǵa shyǵarǵan ıllıýstrator emes, Samal – sezimniń aktrısasy», dep baǵa bergeni áli esimizde. Ol shynymen solaı. Sebebi Samaldyń boıynda tazalyǵy men shynaıylyǵynan bólek, aınalasyndaǵy qubylystyń barlyǵyn kóńil kózimen kóre alatyn aıryqsha sezimtaldyǵy bar. Bul – ásirese kıno aktrısasy úshin taptyrmas qasıet.

Aktrısa aıtady: – Men eshqa­shan tanymal bolamyn dep oıla­ǵan joqpyn. Aldyma ondaı maq­sat ta qoıǵan emespin. Men úshin qashan da oınaǵan rólimniń sany emes, sapasy birinshi orynda turdy. Oqýǵa túsken sátten-aq Samal esimimdi kórermen esinde qaldyratyndaı bir jaqsy kıno túsirilse, sodan basty ról buıyrsa eken dep armandadym, Alla taǵala ol tilegimdi «Aıka» fılminde oryndady ǵoı dep oılaımyn. «Aıkada» maǵan rejısser 99,5 paıy­z iri planda ekrannan kórinýime, boıymdaǵy bar múmkindigim men qabiletimdi synap kórýge jaǵdaı jasady. Eń bastysy, maǵan sendi. Mundaı ról kez kelgen aktrısaǵa arman ǵoı dep oılaımyn. Rejıs­ser qolyma ssenarııdi bergende meni eń birinshi «Aıkanyń» taqyryby, ıdeıa­sy qyzyqtyrdy. Árıne, aýyr ról ekenin sezdim. Alyp shyǵý ońaıǵa túspeıtinin de bildim. Alaıda meni ana men bala arasyndaǵy baılanys degen tylsym álem qyzyqtyryp, táýekel etpesime qoımady. Basynda «Mundaı kúrdeli beıneni kemeline keltire keıipteý qolymnan kele qoıar ma eken?», «Keıipkerdiń taý­qy­metke toly taǵdyryn óz deń­geıin­de asha alamyn ba?», «Rejısser qoıǵan údeden shyǵý úshin ne isteýim kerek?» degen sanadaǵy san saýaldyń ishteı biraz sandaltqany da bar. Rejısserdiń usynysynan bas tartpaq bol­ǵan sátterim de boldy. Shynymen de ońaı bolmady. Aıkanyń alty kúndik aýyr taǵdyryn shynaıy kórsetý úshin úzilissiz alty qys túsirilim alańynda ter tóktik. Rejısser fılmniń ár detalin jiti oılastyrdy. О́zińiz de biletindeı, kartına Reseıde taspalandy ǵoı. Túsirilim jumysy uzaq ári qıyn joldan ótti. Tabıǵattyń ár qubylysyna saı epızodtarymyzdyń kórkemdigi men shynaıy shyǵýyna mán bere otyryp jumys istedik. Qar jaýǵanyn kútip, ár kadrdyń barynsha nanymdy, ómirdiń ózimen úndes bolýy úshin janymyzdy da, barymyzdy da saldyq. Tipti keı jyldary Máskeýde qar jaýmaı qoıǵan da kezder boldy. Ondaı sát eriksiz jumysymyzdy toqtatty. Al aıaz syqyrlap, qar jaýǵan kez­degi jumystyń qıyndyǵyn tek sol jerde júrgen túsirilim toby jaqsy biledi. Qar aralas jań­byrda, boranda túsirilim jasa­dyq. Tońý, aıaqtan sý ótý sekil­di qıyndyqtarǵa tózý ǵana emes, ak­terlik oıyndy da óz deń­geıin­de alyp shyǵý kerek boldy. Onyń ústine, fılmniń janry da aýyr. Osy qıyndyqtyń barlyǵyn eńsere júrip kesek beıne týdyrý, árıne, jeńil boldy dep aıta almaımyn. Sondyqtan da ózimdi psıhologııalyq turǵydan tııanaqty túrde daıyndadym. Ana atanǵan apalarymmen kóp keńestim. Perzenthana jaǵalap, tastandy balalardyń taǵdyryn zerttedim. Fılmdegi eń aýyr sát – perzenthanadan qashyp shyqqan sát. Balanyń da, ananyń da taǵdyry qyl ústinde tur. «Mundaı sátte Aıka emes, men ne ister edim?», «Taýqymetke túsken taǵdyrlardy tyǵyryqtan alyp shyǵar jol bar ma?» dep óz-ózime suraq qoıdym, oılandym. Osynyń bárin túısiný, aktrısa retinde alyp shyǵý qazir aıtýǵa ǵana ońaı. Biraq ishki túısigim «Aıkanyń» ǵajap kartına bolatynyna, álemniń nebir myqty kınogerleri pikir bildiretin týyndy bolaryna senimdi boldym. Tipti dodaǵa túskennen-aq men fılmniń úzdikter qatarynan kórinetinine sendim. Alaıda onyń ishinde ózim daralanyp shyǵamyn degen oı bolǵan emes. О́ıtkeni Kann festıvalinde fılmder tek bir atalym boıynsha ǵana marapattalady. Sahnadan meni festıvaldiń úzdik aktrısasy dep habarlaǵanda jylap jiberdim. Ol eń áýeli qýanyshtyń kóz jasy bolsa da, ekinshiden, «júldeni jalǵyz men emes, tutas fılm alý kerek edi ǵoı» degen ishki ókinishtiń de kóz jasy bolatyn. Biraq sarapshylar solaı sheshken eken.

Men oıladym: Senim aldamapty. Túsirilim jumysy qandaı aýyr joldan ótse, fılmniń jaryqqa shyqqan sátinen bastap ol eńbek shyǵarmashylyq topty jarqyn jeńiske bastady. Onyń eń áýelgisi hám bastysy – álem kınogerleri kóz tikken áıgili Kann kınofestıvali edi. Qazaq qyzdarynyń ishinen eń alǵashqy bolyp sýyrylyp shyǵyp, kári qurlyqtyń eń bedeldi fes­tıvalde moıyndalýy, álbette, Samaldyń ataǵyn bir-aq sátte jahanǵa máshhúr etken juldyzdy sát boldy. Iá, keıipker – qııaldyń jemisi. Al sol keıipkeriniń bolmysy men taýqymetti taǵdy­ryn mıllıondaǵan, tipti mıllıard­taǵan kórermenge shynaıy jetki­ze bilý – aktrısanyń sheberligi hám baqyty.

Aktrısa aıtady: – Bir baıqaǵa­nym, maǵan rejısserler tarapynan kóbinese tek bir amplýadaǵy, ıaǵnı analardyń róli usynylady eken. Ol sonaý Qyzyljardyń О́ner kolledjinde oqyp júrgendegi «Qyzǵaldaq» fılmindegi rólimnen bastap Aıkaǵa deıin jalǵasty. Al Kann kınofestıvalinen keıin otandyq rejısserlerden kelip túsken tolassyz usynystardyń deni de negizinen analar beınesi eken. Olardyń birnesheýinde oınap ta úlgerdim. Dese de aktrısa bolǵannan keıin ózimdi, múmkindigimdi basqa da túrli harakterdegi beınelerde synap, baıqap kórgim keledi. Ol aktrısanyń ósýi, damýy úshin asa mańyzdy dep oılaımyn. Máselen, maǵan jıi qoıylatyn suraqtardyń biri: «О́zińizdiń ázirge balańyz joq, bul fılmdegi analar beınesin somdaýda qandaı da bir qıyndyq týdyrdy ma?» degen saýal. Qıyn ekeni ras. Biraq ekinshi jaǵynan onyń utymdy tustaryn da kórýge bolatyndaı. Mysaly, eger men Aıkany oınaǵan sátke deıin ana atanǵan, perzent súıgen bolsam, múmkin keıipkerimdi dál bulaı shyǵara almas pa edim dep te oılaımyn keıde. О́ıtkeni ana baqytyn sezinip, balaǵa degen mahabbatty basynan ótkergen adam sharanasyn perzenthanaǵa tastap kete almas edi. Kıno bolǵan soń tastap ketersiń-aý, biraq qımastyq sezimi báribir oıynymnyń astarynan ańǵarylyp qalýy múmkin edi. Sebebi ana júregin aldaý múmkin emes. Osy jaǵynan kelgende maǵan bul jaǵdaı kerisinshe utymdy boldy. Muny men kásibı kózqaras turǵysynan aıtyp otyrmyn. Áıtpese, Aıkanyń ishki kóńil kúıin berýi qandaı aktrı­saǵa da ońaı emes. О́zim úshin ásirese perzentti ómirge áke­le salǵannan keıin ananyń syrt­q­y hám ishki kúızelisin berý, qaqaǵan aıazdaǵy onyń tirshilikpen arpalysy, qaljyraǵan, ábden sharshaǵan kúıin keıipteý, solaı bola tura rólińdi nanymdy jetkizý úshin ishteı myqty bolý tepe-teńdigin ustaý jeńil bolǵan joq. Biraq sol qontrast, qarama-qaıshylyǵymen de «Aıka» meni kásibı turǵyda shyńdady ǵoı dep oılaımyn. Qalaı degende de bul fılm shyǵarmashylyǵymdaǵy tyń tájirıbe bolǵany sózsiz. Áli esimde, túsirilim jumysy aıaqtalǵan soń rejısserden: «Sergeı myrza, men aktrısa retinde siz artqan senim­nen shyǵa aldym ba, oıynyma kóńilińiz toldy ma, tek shyny­ńyzdy aıtyńyzshy?» dep suradym. Sondaǵy Sergeıdiń «Iá» degen jalǵyz aýyz jaýaby men úshin búgingi baǵyndyrǵan barlyq mara­pattan da qymbat bolatyn. О́ıt­keni ol eń áýeli meniń aktrısa re­tindegi óz-ózime moıyndalýym edi.

Men oıladym: Bir tańǵalar­lyǵy – qanshama dańq bıiginde júrse de, Samaldyń sol baıaǵy qarapaıym, bııazy qalpyn bir joǵaltpaıtyndyǵy. 22 jasynan bastap uzaq jyl Máskeý qalasyn turaq etse de týǵan eli men ana tiline, ulttyq qundylyqtarǵa degen qurmetin joǵaltpaýy, qazaq tilinde tap-taza sóılep, oıyn erkin jetkize alýy da bizdi erekshe tolqytty. Tipti qoıǵan saýal­darymyzdyń ózine baıyppen, ımene otyryp jaýap berýiniń ózi aktrısanyń óz-ózine qoıatyn talaby men talǵamynyń asa joǵa­ry ekendigin ańǵartsa kerek. Áli esimizde, Samaldan Kann kınofestıvalinen júldeli oral­ǵan soń araǵa birshama ýaqyt salyp gazetimizge suhbat berýin ótingenimizde: «Qarap otyrsam, Kann festıvalinde júldeger atanǵan eki jyldan bergi kezeńde bar ýaqytymdy negizinen jýrnalısterge suhbat berýge arnappyn. Endi osyǵan sál úzilis jasasam deımin. Tildeskisi kelgen kóp jýrnalıstiń usynysynan bas tartyp ta júrmin. Ol tipti de mensinbeýshilik emes, durys túsinseńizder eken. Men dál qazirgi sátte ýaqytymnyń bar­­lyǵyn shyǵarmashylyqqa ar­nap, kórermenderim súısine tama­sha­laıtyn óner týdyrǵym kele­di» degen edi. Sol sát endi týǵan­daı. Sebebi qazir Samal tany­mal kıno aktrısasy ǵana emes, teatr sahnasyn da erkin baǵyn­dyr­ǵan sheber ártiske aınaldy. Astana qalasy Mýzykalyq jas kórermender teatryndaǵy jemisti shyǵarmashylyq qyzmeti sonyń aıqyn aıǵaǵy. Keıingi ýaqytta táýelsiz «Sham» teatrynyń reper­týaryndaǵy «Konferensııa» spek­taklinde de kesek beıne somdap, kórermenniń qoshemetine bólendi. Munyń barlyǵy, álbette, júıeli bilim men shyǵarmashylyq úzdiksiz izdenistiń jemisi bolsa kerek.

Aktrısa aıtady: – Qyzyl­jar­daǵy О́ner kolledjin támam­daǵannan keıin bilim izdep Máskeýge qonys aýdardym. Reseıdiń teatr óneri ınstıtýtyna (GITIS) oqý­ǵa túsip, bilimimdi shyńdadym. Sol jaqta júrip osy «Aıka» fıl­min taspaladyq. Jalpy, meni joly bolǵan adam dep aıtýǵa bolatyn shyǵar. Sonaý talapker kúnimdegi qulaǵyma kezdeısoq shalynǵan skrıpkanyń syrly úni meni ónerdiń úlken saraıyna jetelegen eken. Jolym bolyp, óner kolledjiniń stýdenti atandym, sáti túsip Reseıdiń teatr óneri ınstıtýtynda bilimimdi shyńdadym. Rejısser Sergeı Dvorsevoımen jolyǵýym – ol da bir taǵdyrdyń teńdessiz tartýy. Ony men ár ýaqytta qaıtalaýdan jalyq­paımyn. Ras, Máskeýge qo­nys aýdarǵanda da, oqýǵa tapsyr­ǵanda da túrli synaq boldy ǵoı. Sonyń bir ǵana mysalyn aıtsam, emtıhan tapsyrǵanda Máskeý oqytýshylary: «Sizdiń akterlik sheberligińizdi joǵary baǵalap otyrmyz. «Sahna tili» pániniń oqytýshylary qabyldaǵysy kelip otyr. Biraq únińizdiń báseńdigimen kúresý kerek» dep áreń qabyldaǵan bolatyn. Sodan keıin-aq men óz-ózimmen úzdiksiz jumys isteı bas­tadym. Al endi týǵan jerge degen saǵynyshqa kelsem, árıne, alysta júrgende Otanyńdy, aýylyńdy, ata-anańdy saǵynasyń ǵoı. Men de saǵyndym. Jalpy, men Máskeýge túbegeıli turaqtap qalý úshin emes, bilimimdi shyńdaý maqsatynda ketken edim. Osy ýaqyt aralyǵynda azamattyǵym da ózgergen joq. Qarapaıym qazaqtyń qyzy bolyp qaldym. Qazir endi Astana qalasynda Mýzykalyq jas kórer­mender teatrynda qyzmet etemin. Oınap júrgen biraz rólim bar. Kıno salasyn da qatar alyp júrý oıda bar. Jaqsy, sapaly ssenarııler bolsa, nege tús­peske? Utymdy usynystyń bá­rine ashyqpyn. Sóz basynda aıtyp ótkenimdeı, meniń kıno salasyndaǵy ómirbaıanym asa baı emes. Qorjynymda sanaý­ly ǵana fılm bar. Biraq oǵan ókinbeımin. Maǵynasyz kóp fılmge túskenshe, ózimdi el esinde qalatyn jalǵyz týyndymen tanytqym keldi. «Aıka» jaryqqa shyǵyp, úzdik atanǵannan keıin otandyq rejısserler tarapynan kóptegen usynys túsip jatyr. Olarǵa ssenarııdi oqyp, saralap alǵannan keıin, tańdap-talǵap túskim keledi. Men úshin mezettik ataq mańyzdy emes. Al qarjylyq jaǵynan kelsek, árıne aqsha bárimizge de kerek qoı. Biraq ónerge aqsha úshin kelgen joqpyn. Meniń maqsatym basqa – ekran men sahnada ólmes óner týdyrý, sol arqyly ózimdi dáleldeý. Al jumystan sharshap, jańa bir serpilis alǵym kelse, onda úzilis jasap jiberip, birden týǵan aýylym – Aralaǵashqa, ata-anamnyń qasyna ketip qalamyn. Ol jaqta ótken demalystyń orny da, jóni de bólek. Jastaıymnan jyraqta júrgendikten be eken, aýyl­ym dese shyǵarda janym bólek. Ol – meniń máńgilik saǵynyshym. Sol saǵynysh únemi shabyttandyrady. Endigi armanym – týǵan elime qyzmet etý. Boıymdaǵy bar ónerimdi sarqyp berip, shyǵarmashylyq múmkindigimdi kórermenderime dáleldeý. Buǵan deıin Máskeýdegi oqýym dedim, odan keıin «Aıka» fılminiń túsirilimi dep on jyldan asa Reseıdi turaq ettim. Endi, mine, túbegeıli elge oralyp, biraz jyl bolyp qaldy Mýzykalyq jas kórermender teatryndaǵy qyzmetimdi zor mahabbat, qulshynyspen atqaryp júrmin. Endigi maqsat – ónerge adal qyzmet etý.

Áńgimelesken –

Nazerke JUMABAI,

«Egemen Qazaqstan»