Qazirgi ýaqytta Parlament Májilisinde 18 áıel depýtat bar. Erlan Qoshanov olardyń memlekettiń ıgiligi jolyndaǵy eren eńbegi men zań shyǵarý isine qosqan mol úlesin atap ótti.
Jańa Májilistiń jasaqtalǵanyna 2 jyl tolǵaly otyr. Májilis tóraǵasy osy ýaqyttyń ishinde kóp jumys atqarylyp, mańyzdy zańdar qabyldanǵanyna erekshe nazar aýdardy.
«Qasym-Jomart Toqaev Parlamentke úlken senim artyp otyrǵanyn bilesizder. Halyqtyń da bizge artar amanaty men úmiti zor. Prezıdenttiń sol tapsyrmalaryn, azamattardyń talap-tilegi men muń-muqtajyn sizder abyroımen atqaryp kelesizder. Sol úshin sheksiz alǵys aıtamyn», dedi Palata spıkeri.
Jıyn barysynda Erlan Qoshanov bıylǵy kóktem merekesinde jańa dástúrdiń negizi qalanyp jatqanyn aıtty.
«Prezıdent Qasym-Jomart Toqaev áıelder qaýymynyń birqatar ókilin memlekettik nagradalarmen marapattaý jóninde arnaıy jarlyqqa qol qoıdy. Olardyń qatarynda bizdiń de áriptesterimiz bar. Jańa ǵana Aıgúl Quspan Memleket basshysynyń qolynan «Parasat» ordenin aldy. Taǵy bir mártebeli marapatty Prezıdentimiz maǵan tabystaýdy tapsyrdy. Depýtat Ajar Saǵyndyqova búgin «Qurmet» ordenimen marapattalady. Bul nagradalar – Memleket basshysynyń Májilistegi arýlardyń bárine bergen joǵary baǵasy dep bilemin», dedi Májilis tóraǵasy.
