Ulytaý óńiri sý tasqyny qaýpi joǵary aımaqqa jatady. Oblys aýmaǵyndaǵy 27 eldi mekende sý basý qaýpi bar. Ol jerlerde eki myńnan asa adam turady.
Premer-mınıstrdiń orynbasary Qanat Aldabergenuly óńirdegi bógetter men sý qoımalarynyń jaıymen tanysty. Qarakeńgir, Sarykeńgir, Qaratorǵaı, Sarysý sekildi iri ózenderdiń arnasyn tikushaq arqyly aralap ótti. Byltyr ondaǵan úıdi sý basqan Jezdi kentine baryp, Jezdi ózeni arnasynyń jaǵdaıyn tekserdi. Onda sanasııa, arnany tazartý jáne jaǵalaýdy nyǵaıtý (2 shaqyrym) júrgizilip jatyr.
Keńgir jáne Jezdi sý qoımalarynda bolyp, Jezdi aýylyndaǵy qorǵanys bógetterin kóterýdi tapsyrdy. Malshybaı, Boztumsyq, Qorǵasyn aýyldaryn, Qostanaı oblysynyń shekarasyna deıin aralap shyǵyp, Kenenbaı jáne Qarsaqbaı bógetterine tekserý júrgizdi. Sarysý ózeniniń boıynda ornalasqan Jylandy jáne Jańabas eldi mekenderin aralady.
Byltyr oblysqa qaraıtyn úsh aýylda 22 úıdi sý basqan. Bıyl osy aımaqtar erekshe baqylaýǵa alynǵan. Ulytaý oblysy ákimi Dastan Ryspekovtiń aıtýynsha bıyl oblys boıynsha 15,7 shaqyrym bóget jáne 115 metr aryq salyndy.5,8 shaqyrym kanal, 1,3 shaqyrym aryq jáne 281 birlik sý ótkizý qubyrlary tazartyldy. Taldysaı ózeniniń arnasy tazalanyp, Jylandy aýylyndaǵy Sarysý ózeniniń jaǵalaýyn bekitý boıynsha sharalar qabyldanǵan.
Vıse-premer Q.Bozymbaev «Arnaıy júrgizilgen taldaý nátıjesi bes-alty aýylǵa qaýip tónip turǵanyn kórsetti. Sondyqtan osy aýyldar qatań baqylaýǵa alynsyn. Eger qajet bolsa bóget turǵyzyp, aryq qazý kerek. Qar shyǵarý jumysyn jedeldetip, bul mindetti 10-15 kúnde aıaqtaý qajet. Ár aýylda keminde 10 arnaıy tehnıka men júzden astam jeke quram tótenshe jaǵdaıǵa ázir turý kerek», dep qadap aıtyp, otyn, azyq-túlik jáne medısınalyq quraldar rezervterin daıyndaýdy qamtamasyz etýge tapsyrma berdi.
