Foto: Aqorda
«Memleket aýyl eńbekkerlerin qoldaýdy barynsha kúsheıtti. Byltyr kúzde 27 mıllıon tonna astyq jınap, rekordtyq kórsetkishke qol jetkizdik.
Kásipkerlikti damytýǵa árdaıym basa nazar aýdarylady. Turǵyn úı qurylysynyń qarqyny edáýir ósip, byltyr 19 mıllıon sharshy metr baspana paıdalanýǵa berildi. Bul da – buryn-sońdy bolmaǵan jetistik», dedi Memleket basshysy.
El Prezıdenti sondaı-aq basqa da iri jetistikterge toqtaldy.
«2019 jyldan beri elimizde 250-den astam jataqhana salyndy. Sonyń nátıjesinde oryn tapshylyǵy 6 ese qysqardy. Stýdentter sany udaıy kóbeıip, joǵary oqý oryndarynda 624 myń azamat bilim alyp jatqanyna qaramastan, osyǵan qol jetkize aldyq.
Elimizdiń 90 myńnan astam azamaty shetelde oqıdy. Bul bizdiń qoǵamnyń ashyqtyǵyn kórsetedi. Azamattarymyz demalý úshin shetelge jıi shyǵatyn boldy. Bizdiń kók tólqujatymyz álemdegi 92 memlekettiń aýmaǵyna vızasyz emin-erkin kirýge múmkindik beredi.
Qazaqstan – halyqaralyq arenada zor qurmetke ıe memleket, bizdiń elimizdi «orta derjava» dep ataıtyn boldy. Birikken Ulttar Uıymynyń Bas Assambleıasy Almatyda Ortalyq Azııa men Aýǵanstan úshin Ornyqty damý maqsattary jónindegi Birikken Ulttar Uıymynyń aımaqtyq ortalyǵyn ashý týraly qarar qabyldady. Osy sheshim elimizdiń álemdegi yqpaly men bedeli zor ekenin ańǵartady», dedi Prezıdent.
