Máýlen Áshimbaev óz sózinde azyq-túliktiń tapshylyǵy men ashtyq qazirgi tańda jahandyq kún tártibindegi eń ózekti máselelerdiń biri ekenin aıtty. Birikken Ulttar Uıymynyń málimetterine sáıkes álemde 340 mıllıonnan asa adam azyq-túliktiń jetistpeýinen zardap shegip otyr. Al 2 mıllıonǵa jýyq adam ashtyqtyń aldynda tur.
Osy rette qazirgideı geosaıası shıelenis jáne ekologııalyq qaterler jaǵdaıynda Qazaqstannyń bastamasymen qurylǵan Azyq-túlik qaýipsizdigi jónindegi ıslam uıymynyń qyzmeti erekshe mańyzǵa ıe bolyp otyr.
«Prezıdent Qasym-Jomart Toqaev azyq-túlik qaýipsizdigin qamtamasyz etý Qazaqstannyń aldynda turǵan strategııalyq mindetterdiń biri ekenin aıtty. Bul baǵytta Azyq-túlik qaýipsizdigi jónindegi ıslam uıymy jahandyq azyq-túlik máselelerin sheshý jolynda mańyzdy ról atqarady. Biz uıymnyń gýmanıtarlyq daǵdarysqa ushyraǵan elderge, onyń ishinde Aýǵanstan turǵyndaryna kómek kórsetý jónindegi bastamalaryn joǵary baǵalaımyz», dedi M.Áshimbaev.
Kezdesý barysynda Memleket basshysynyń tapsyrmasymen Qazaqstanda aýyl sharýashylyǵy salasyn memlekettik qoldaý jáne halyqty qoljetimdi ári sapaly azyq-túlikpen qamtamasyz etý baǵytynda júıeli sharalar qabyldanyp jatqany aıtyldy. Sonyń aıasynda Senat depýtattary elimizdiń azyq-túlik táýelsizdigin nyǵaıtý máselesin basty nazarynda ustap keledi.
Sonymen qatar taraptar Ortalyq Azııa elderiniń agroklımattyq jaǵdaıy, ekologııalyq problemalary jáne ekonomıkalyq baılanystary uqsas ekenine nazar aýdaryp, ortaq tásilderdi ázirleý úshin aımaqtaǵy yntymaqtastyqty arttyrý tetikterin talqylady.
Sondaı-aq Senat tóraǵasy Bahreınde uıymdastyrylǵan halyqaralyq konferensııa aıasynda dinı lıderlermen bolǵan kezdesýlerdiń qorytyndylaryna nazar aýdardy jáne Berik Aryndy 2025 jylǵy 17-18 qyrkúıekte Astanada ótetin «Dinder dıalogy: bolashaq jolyndaǵy sınergııa» atty Álemdik jáne dástúrli dinder lıderleriniń VIII Sezine qatysýǵa shaqyrdy.
