Foto: parlam.kz
E.Smyshlıaevanyń aıtýynsha osydan eki jyl buryn qabyldanǵan sıfrlyq aktıvter týraly zań ınnovasııalyq naryqty retteý men damytýdyń alǵashqy qadamy boldy. Alaıda, saladaǵy jaǵdaı kún saıyn ózgerip otyratyndyqtan alǵa jyljý kerek. Aǵymdaǵy jaǵdaıdy taldaý ındýstrııanyń birqatar problemalaryn kórsetti. Qazirgi ýaqytta Qazaqstandaǵy sıfrlyq aktıvter «Astana» halyqaralyq qarjy ortalyǵynyń (AHQO) krıptobırjalarynda ǵana zańdy túrde aınalysqa jiberile alady. Bul rette, sarapshylardyń baǵalaýynsha, Qazaqstannyń krıptoınvestorlarynyń 5% -y ǵana osy alańdy paıdalanady, al qalǵandary «sur aımaqta» jumys isteıdi.
E.Smyshlıaevanyń sózinshe, ekinshiden, el ekonomıkasyna sıfrlyq maınerlerdiń qatysýy tómendep otyr.
«Búginde kompanııalar salyq tóleıdi, maınerlerdiń ortalyqtary energııa júıesiniń teńgerimdeýshi elementine aınaldy. Alaıda, ázirge mundaı kompanııalarǵa degen senim deńgeıi tómen kúıinde qalyp otyr, olar zor áleýet pen resýrstarǵa ıe bolǵanymen, is júzinde ınnovasııalyq ekonomıkaǵa qatyspaıdy», dedi E.Smyshlıaeva.
Depýtattyń sózinshe búginde sıfrlyq aktıvter salasy jylystatý ortasyna aınalǵandyqtan qylmystyq kiristerdi zańdastyrý beleń alǵan. Zańsyz krıptoalmasýshylarǵa qatysty birqatar qylmystyq ister boıynsha aınalym mólsherindegi óndirip alý somasy 5-6 mlrd. teńgeni quraıdy.
Osy jáne basqa da jaıttardy taldaı kele Májilis depýtaty Ekaterına Smyshlıaeva Sıfrlyq aktıvter salasyn odan ári damytý jáne zań buzýshylarǵa arnalǵan qylmystyq quramdardy qaıta qaraý boıynsha birqatar usynystaryn aıtty.
«Kóleńkeli naryqty azaıtý úshin qamtamasyz etilmegen sıfrlyq aktıvterdiń aınalymyna salynǵan tyıymdy shekteý sharasyna ózgertý, ıaǵnı jeke tulǵalarǵa lısenzııalanǵan platformalar arqyly qatysýǵa múmkindik berý.
Sıfrlyq aktıvterdiń barlyq túrlerin zańdy túrde shyǵarý jáne aınalymǵa engizý ınfraqurylymyn keńeıtý maqsatynda sıfrlyq aktıvter salasyndaǵy qyzmet kórsetetin lısenzııalanǵan provaıderlerdiń (aıyrbastaý oryndary) sanyn kezeń-kezeńimen AHQO aıasynda, keıin ulttyq deńgeıde arttyrý.
Sıfrlyq aktıvter salasyndaǵy qylmyspen kúres tıimdiligin arttyrý úshin baqylaý sharalaryn qarapaıym paıdalanýshylardan alaıaq deldaldarǵa aýystyrý.
Sıfrlyq aktıvter salasyndaǵy quqyq buzýshylyqtar boıynsha qylmystyq jaýapkershilik negizderin qaıta qaraý.
Lısenzııalanǵan maınıngtik kompanııalardy energetıka salasyn qosa alǵanda, túrli ınvestısııalyq jobalarǵa qatysýǵa tartý.
Innovasııalyq qyzmetti qoldaýdyń basym baǵyttarynyń qataryna qamtamasyz etilgen sıfrlyq aktıvterdiń shyǵarylýy men aınalymyna baılanysty jobalardy qosý.
Sıfrlyq aktıvter salasyn retteý úshin pılottyq jáne eksperımenttik quqyqtyq rejımderdi keńinen paıdalaný», dedi májilismen.
E.Smyshlıaevanyń aıtýynsha zańnamany ózgertý boıynsha qazirgi ýaqytta depýtattar retteýshi organdarmen birlesip shuǵyl, perspektıvaly usynystar daıyndady. Alaıda, Sıfrlyq kodeks jobasy 7 aı boıy úkimettiń qorytyndysyn kútip jatyr.
«Atalǵan qujattar sıfrlyq aktıvtermen operasııalardyń ashyqtyǵy men zańdylyǵyn qamtamasyz etýge múmkindik beredi. Osyǵan baılanysty, tıisti memlekettik organdardyń bul másele boıynsha kelisim berýin jáne úılesimdi jumys isteý prosesin jedeldetýin suraımyz», dep aıaqtady saýalyn depýtat.
