Foto: instagram.com/janibek_alimkhanuly
Jánibek Álimhanuly - Anaýel Ngamıssenge jekpe-jek aldyndaǵy sońǵy baspasóz konferensııasyna qatysyp, daıyndyqtary týraly aıtyp berdi.
Jánibek Álimhanuly osy kezdesýge Túrkistan oblysynda daıyndalǵan. Sparrıng qarsylastar retindi jergilikti boksshylardy tańdap, tájirıbe bólisken. Ol elimizde ótetin jekpe-jeginiń aıryqsha mańyzdy ekenin, tyńǵylyqty daıyndalǵanyn atap ótti.
«72 kelide 4 belbeýdi jınasaq degen maqsatymyz bar. Qarsylasqa keletin bolsaq, qarsylas áýesqoı, kásipqoı boksta judyryqtasqan óte tájirıbeli, jeńilip kórmegen boksshy Qudaı qalasa baǵymyzdy osy jekpe-jekte synap kóremiz. Qazaqstandyqtar, jankúıerler úlken boksty saǵynyp qalǵan. Úlken shoýlar elimizde bolmaǵan. Sondyqtan barymyzdy salyp óner kórsetemiz. Biz árdaıym qarsylas tańdamaǵanbyz jáne myqty boksshylarmen shyǵýdy maqsat etip qoıǵanbyz. Basty maqsatym - orta salmaqta ústemdik etý», dedi J. Álimhanuly.
Al onyń qarsylasy Astanaǵa jekpe-jekke 1 apta qalǵanda kelipti. Anaýel Ngamıssenge Qazaq eli, qazaq boks mektebi týraly oń pikir bildirdi. Sondaı-aq, Jánibek Álimhanulyna qarsy burynǵy qarsylastaryna qaraǵanda kóbirek jattyǵyp, daıyndalǵanyn jetkizdi.
«Jánibek - myqty qarsylas. Men onymen judyryqtasý úshin ádettegiden uzaq daıyndaldym biraq ózime senimdimin, daıyndyǵym da jaqsy», dedi fransııalyq boksshy.
Aýqymdy boks keshin uıymdastyrýshy Nomad promoýsheni Qazaqstanda osy formattaǵy boks keshin uıymdastyrý ońaıǵa soqpasa da, alǵan baǵyttan taımaı jankúıerlerdi qýantýǵa daıyn ekenin tilge tıek etti.
«Muhıttyń arǵy jaǵynan boksshylardy aldyrý, deńgeıi joǵary boks keshin uıymdastyrý barysynda bıýrokratııalyq kedergilerge tap bolsaq ta, ony sheshe bildik. Bul sharanyń jarnamalanýy turǵysynan biraz syn aıtylyp jatyr. Dese de biz qazir tájirıbe jasap jatyrmyz. Kelesi rette barlyq syn eskeriledi. Qazir boks keshine arnalǵan bıletterdiń 50 paıyzdan kóbi satylyp ketti. Sońǵy eki kúnde bılet alý belsendiligi artatynan senim mol», dedi Nomad promoýsheniniń bas dırektory Rýstam Qýanyshalıev.
