Tanymal sportshylar, zııaly qaýym jáne BAQ ókilderi men mektep oqýshylary qatysqan tusaýkeserde kitapty shyǵarý týraly ıdeıany usynǵan Oqýshylar saraıynyń dırektory Indıra Ikapova jastardyń jigerin oıatý úshin osyndaı kitaptar jazý, kezdesýler uıymdastyrý mańyzdy ekenin aıtyp ótti. Al Bekzattyń anasy Syrlygúl Shoıbekova balasynyń sportqa degen súıispenshiligi men tabandylyǵy týraly estelikterimen bólisti. Kitaptyń avtory Erjan Arǵynbaev týyndynyń jazylý tarıhyn tanystyryp, Bekzattyń jeńisti joly, rýhanı bolmysy men armandary týraly baıandady. Jıynǵa qatysýshylar Bekzattyń murasyn saqtaý men dáripteý jaıly oı-pikirlerin ortaǵa saldy.
Sondaı-aq Túrkistan qalasyndaǵy «Olympic Center» sport kesheninde Bekzat Sattarhanovty eske alýǵa arnalǵan 2007-2008 jyly týǵan jastar arasynda halyqaralyq týrnır ótti. Bıyl HHIII ret uıymdastyrylǵan boks dodasyna Reseı, О́zbekstan, Qyrǵyzstan, Mońǵolııa, Tájikstan, Ázerbaıjan, Qytaı, Egıpet, Saýd Arabııasy, Kýveıt elderimen qatar Qazaqstannyń barlyq aımaǵynan bylǵary qolǵap sheberleri qatysty. Boks básekesinde erler 13 salmaq boıynsha judyryqtassa, qyzdar 6 salmaq dárejesinde jeńimpazdardy anyqtady. Jalpy 30 komanda, 300-ge jýyq boksshy baq synaǵan dodada Túrkistan oblysynyń jigitter quramasy tolyq quramda óńir namysyn qorǵasa, qyzdar quramasy 4 salmaq dárejesinde rıng tórine kóterildi.
Aıta keteıik, IBA talaptaryna saı ótkeli jatqan halyqaralyq boks dodasynda jeńimpaz atanǵan sportshylarǵa sport sheberi ataǵy beriledi.
