Aıda Balaeva óz sózinde qazaqstandyqtardyń Jeńiske qosqan úlesin sanmen ólsheý múmkin emestigin atap ótti.
Qazaq tarıhshylarynyń deregine súıensek, 1941 jyldyń 22 maýsymynan 1945 jylǵy 31 jeltoqsanǵa deıin 1 196 164 adam áskerge shaqyrylǵan. 1938 jyldan bastap áskerge alynǵandardy eskersek, jalpy 1 366 164 azamat soǵysqa qatysqan.
«Demek, respýblıkadaǵy ár besinshi turǵyn maıdanǵa attandy. Onyń ústine, soǵysqa er azamattar, bilikti mamandar, jumysshylar ketti. Tórt jyl boıy maıdangerler qalypty ekonomıkalyq jaǵdaıdan syrt qaldy. Osylaısha, Qazaqstannyń ekonomıkalyq turaqty damýy nasısterdiń KSRO-ǵa basyp kirýimen toqtady», dep atap ótti mınıstr.
Aıta keteıik, Qazaqstan aýmaǵynda 12 atqyshtar jáne 4 kavalerııa dıvızııasy, 7 atqyshtar brıgadasy, 50-ge jýyq jeke polk pen batalon qurylǵan. Olardyń ishinde 3 kavalerııa dıvızııasy men 2 atqyshtar brıgadasy qazaq ulttyq birlestigi boldy. Soǵystyń sońyna deıin saqtalǵan 12 dıvızııanyń barlyǵy qurmetti ataqtarǵa ıe boldy. Onyń ishinde bes dıvızııa «gvardııalyq» mártebesine laıyq dep tanylǵan.
Soǵysta 601 011 qazaqstandyq qaza tapqan. Olardyń ishinde 279 696 adam, 46,5%-y shaıqasta dúnıe saldy; 42 766 adam nemese 7,1%-y gospıtalde jaraqat pen aýrýdan kóz jumdy; 271 503 adam (45,2%) – habar-osharsyz ketken. Sondaı-aq, qazaqstandyq tarıhshylardyń sońǵy derekteri boıynsha, tutqynǵa túsken 128 myń qazaqstandyq sarbazdyń tek 23 myńy ǵana úıine oralǵan.
