Foto: Joǵarǵy sot
T.esimdi aıyptalýshy «FlyArystan» AQ-nyń Astana – О́skemen baǵytyndaǵy áýe kemesi bortynda buzaqylyq jasap, áýe kemesiniń bortserigin uryp-soǵyp, jolaýshynyń eskertýin elemeı oǵan da judyryq jumsaǵan. Tergeý barysynda eki jábirlenýshi de dene jaraqatyn alǵany anyqtaldy.
Jolaýshy reısten qaldyrylǵanda buzaqylyq nıetpen terrorızm aktisi týraly kórineý jalǵan habarlaǵan. Astana qalasynyń qylmystyq ister jónindegi aýdanaralyq soty ony 3 jylǵa bas bostandyǵynan aıyrǵan bolatyn. Aıyptalýshynyń advokaty jazany bas bostandyǵyn shekteý túrine aýystyrýdy suraǵan.
Qylmystyq ister jónindegi apellıasııalyq alqa sottalǵanǵa qatysty úkimdi ózgerissiz qaldyrdy.
«Sot úkimimen T. terrorızm aktisi týraly kórineý jalǵan habarlaǵany (QK 273-baby) jáne áýe kemesiniń bortynda buzaqylyq jasaǵany úshin QK 293-baby 2-bóliginiń 4 tarmaǵy boıynsha kináli dep tanyldy. Sottalýshynyń kinási jábirlenýshilerdiń aıǵaqtary, sarapshylardyń qorytyndylary jáne qylmystyq istiń basqa da materıaldarymen dáleldengen», delingen Astana qalalyq soty baspasóz qyzmetiniń habarlamasynda.
Sot aktisi zańdy kúshine endi.
