Áıelder saıysynda Qaraǵandy oblysy men Almaty qalasy qurama komandalarynyń mysy basym boldy. Sarapqa salynǵan 10 bas júldeniń úsheýin sol óńirdiń burymdylary ıelendi. Qaraǵandylyqtar qatarynan Olesıa Terenıýk (45 kg), Darıa Balabaıýk (59 kg), Lıýbov Kovalchýk (+87 kg) qarsylas shydatpasa, Alataý baýraıynan kelgen arýlar arasynan Araı Turlybekova (71 kg), Aıanat Jumaǵalı (76 kg), Aqerke Baımanap (87 kg) altynnan alqa taqty.
64 kg salmaqta Karına Gorıcheva óziniń myqtylyǵyn taǵy da moıyndatty. Taıaý kúnderi 32 jasqa tolǵaly otyrǵan Jetisý oblysynyń týmasy talaı asa jaýapty jarystarda júlde alǵanyn jankúıerler jaqsy biledi. Kezinde ol Rıo Olımpıadasynda qola medaldy moınyna ilip, Dúnıejúzilik ýnıversıadada kúmispen kúpteldi. Keıinnen Karına úlken arenalardan kórinbeı ketken edi. Birer jyl sporttan qol úzip qalǵan otandasymyz byltyr túrli básekede qaıta boı kórsete bastady. Mine, endi ardager aýyr atlet el chempıonatynda qaıta top jardy. Qaraǵandyda Gorıcheva 196 (91+105) kılogrammdyq ziltemirdi eńserip, jastar býynynyń ókilderi Altynaı Táńirbergenova men Ámına Sháripovaǵa shań qaptyryp ketti. Qalǵan úsh altyndy jambyldyq Aınur Ábdihalyqova (49 kg), aqmolalyq Iýlııa Troshkına (55 kg) men Vıktorııa Novıkova (81 kg) jeńip aldy.
Erlerdiń básekesinde Qostanaı oblysy ókilderiniń qarqyny kúshti boldy. Jergilikti sportshylar arasynan Alekseı Chýrkın (85 kg), Egor Sherer (89 kg), Denıs Polýboıarınov (102) aldaryna jan salmady. Úsheýi de dúbirli dodalarda daralanyp júrgen myqty sportshylar. 21 jastaǵy Chýrkın 2022 jylǵy álem chempıonatynda qola, 2024 jyly kúmis medal ıelendi. 22 jastaǵy Polýbaıarınov 2024 jyly jastardyń qurlyq birinshiliginde bas júldeni oljalady. Sherer Azııa birinshilikterinde san márte jeńis tuǵyryna kóterildi.
109 kg salmaqta Artem Antropovqa (109 kg) teń keler eshkim tabylmady. 25 jastaǵy qaraǵandylyq apaıtós byltyr Manamada álem chempıony atandy. Odan buryn jasópirimderdiń dúnıejúzilik dodasynda altyn alyp, jastardyń jarysynda kúmispen kúpteldi. Artemniń Azııa chempıonatynyń eki dúrkin kúmis júldegeri degen ataǵy taǵy bar. Qazir de naǵyz babynda ekenin baıqatty. Kómirshiler qalasynyń taǵy bir ókili Nurbol Eshimbekov te (55 kg) dál sol mejeden kórindi. Sondaı-aq altyn túǵyrǵa kóterilgender arasynda túrkistandyq Álisher Turǵanbaı (61 kg), jetisýlyq Sergeı Chýev (67 kg), Andas Samarqanov (+109 kg), jambyldyq Aqjol Qurmanbek (73 kg), aqmolalyq Sergeı Petrovıch (96 kg) syndy saıypqyrandar bar.
