Biraq bul ekonomıkasy ósip kele jatqan memlekettiń kásiporyndaryn jańasha kadrlarmen qamtamasyz etýge jetkiliksiz edi. Sondyqtan respýblıkada Dýaldi oqytý júıesi quryldy. Onyń artyqshylyǵy ýnıversıtet, tehnıkalyq kolledjde oqıtyn stýdent teorııalyq bilimmen birge kásiporynda óndiristik praktıkadan ótip, aýdıtorııada alǵan ilimin tájirıbemen ushtastyra bildi. Onyń ústine oqý oryndary zamanaýı qondyrǵy, stanoktardy meńgergen maman daıarlaýda talap údesinen tolyq shyǵa almady. Osy olqylyqtyń ornyn toltyrý úshin de teorııa men tájirıbeni qatar órgizgen baǵdarlama elimizdiń bilim júıesine engizildi.
Ásirese ekonomıkalyq ósim dınamıkasy respýblıkanyń óńirleri arasynda joǵary qarqyn ala bastaǵan Shymkentte Dýaldi oqytý júıesiniń paıdasy jaqsy sezilip jatyr. Megapolıs jastar qalasy. Demografııalyq ahýaldyń oń nátıjesiniń arqasynda shaharda halyq sany jyldan-jylǵa ósip keledi. Bul óz kezeginde jastardan quralǵan jumysshylar armııasynyń qataryn arttyryp otyr. Jyl saıyn myńdaǵan bala tehnıkalyq mamandyq boıynsha oqý bitirip shyǵady. Olardy jumysqa ornalastyrýdyń ózi ońaı sharýa emes. Degenmen oqý oryndarynyń basshylyǵy soǵan muryndyq jasap, kásiporyndarmen tyǵyz baılanysta jumys istep keledi. Bul bir jaǵynan oqý oryndarynyń sapasyn anyqtaıtyn reıtıng úshin de kerek.
Prezıdent Qasym-Jomart Toqaevtyń jańa jumys oryndaryn qurý, eńbek naryǵyn qajetti mamandyqtarmen qamtamasyz etý boıynsha qoıǵan naqty talaby bar. Osy tapsyrmany oryndaý maqsatynda qala ákimdigi shahardaǵy 40 kolledj dırektorlarymen máseleni talqylap, sheshý joldaryn zerdeledi. Aldyn ala júrgizilgen zertteý nátıjesinde Shymkentte mádenıet oshaqtarynda dekorasııa ázirleýshi, býtafora jasaýshy, dybys, jaryq qoıatyn mamandar jetispeıtini anyqtaldy. Atalǵan mamandyqtar tapshylyǵyn joıý úshin jergilikti atqarýshy bılik Qasteev atyndaǵy kórkemsýret pen Saz kolledjine arnaıy tapsyrma berdi. Soǵan sáıkes atalǵan oqý oryndary aldaǵy kezde mádenıet oshaqtaryna qajetti qosymsha jumysshy mamandyqtaryn oqytýǵa kirisedi. Sonymen birge ákimdik tarapynan tehnıkalyq mamandyqtarǵa bólinetin grant sany kóbeıtiledi. Jáne qala bıligi júrgizgen kelissózder aıasynda birneshe kásipker 53 stýdentti ózderiniń esebinen tegin oqytyp, jumysqa ornalastyrýǵa ýaǵdalasty.
О́ńirlik kásipkerler palatasy jyl saıyn eńbek naryǵyndaǵy jumysshy mamandyqtar suranysyn saralaý úshin kásiporyndar arasynda saýalnama uıymdastyrady. Onyń qorytyndysy keıin jergilikti bıýdjetti bekitý barysynda esepke alynady. Byltyrǵy saýalnama 4 myńǵa jýyq bıznes ókilderin qamtyp, megapolıste 16 myńnan astam jumysshy mamandyqtaryna tapshylyq bary anyqtalǵan. Negizinen qurylys, óńdeý ónerkásibi, densaýlyq saqtaý, halyqqa áleýmettik qyzmet kórsetý salalary jumysshy mamandyqtaryna kóbirek muqtaj eken.
Kásipkerler quqyn qorǵaýshy uıym Dýaldi oqytý júıesin jetildirý kerektigin aıtady. Ol úshin arnaıy usynystar ázirlegen. Onyń eń basynda oqý oryndary men kásiporyndardyń baılanysyn nyǵaıtý máselesi tur. Keıingi usynys baǵalaý shkalasyn engizý men monıtorıngti kúsheıtý. Bul dýaldi júıeniń tıimdilin arttyryp, sapasyn jaqsartpaq. Kásiporynda aılyq joǵary bolsa oqý bitirgen túlek mindetti túrde sonda qalýǵa tyrysady. Jalaqyny kóterý jumys berýshige qıynǵa soǵar. Sondyqtan palata memleket jumys oryndaryn sýbsıdııalasa degen usynys tastap otyr.
Dýaldi oqytý júıesine baılanysty bıznes ókilderiniń aıtar óz ýájderi bar. Máselen DDEK kompanııasynyń basshysy Murat Jumataev jastar tokar mamandyǵyn ıgerýge qulshynys tanytpaıdy, jol alys bolǵandyqtan stýdentter zaýytqa kelip-ketýden qınalady, olardyń óndiristik oqý praktıkasyn oqý oryndarynyń basshylyǵy durystap qadaǵalasa eken deıdi. «Janna Eltanova» JShS dırektory, kreatıvti ındýstrııa salasynyń ókili Janna Eltanova «Jastar praktıkasy», «Alǵashqy jumys orny» jobalaryna qatysatyn jumyssyz jastardy memleket jeńil ónerkásip, onyń ishinde toqyma ónerkásibindegi fabrıkalarǵa joldasa eken degendi aıtty.
Jergilikti atqarýshy bılik stýdentterdiń qatynaý máselesin sheshý úshin jolaýshy tasymaldaýshy kompanııalarmen kelissóz júrgizýge ázir. Qala ákimdigi shákirtterdi sapaly maman etip daıarlap shyǵarý úshin kásiporyndarǵa óz qarjysy esebinen tájirıbelik oqý kýrsynan ótkizýge usynys jasady.
Jalpy Prezıdent tapsyrmasyna saı Jumysshy mamandyqtar jylyn nátıjeli ótkerý úshin bıznes salasy, qala bıligi, óńirlik kásipkerler palatasy birlesip tııanaqty jumys atqarýǵa ýaǵdalasyp otyr.
Qoryta aıtqanda qarapaıym jumysshy mamandyqtary elimizdiń ekonomıkasyn kóteretin alyp kúsh. Sondyqtan memleket tarapynan olarǵa qamqorlyq árdaıym joǵary bolý kerek. Qarap otyrsaq kúndelikti ishetin asymyz, kıetin kıimimiz jumysshylardyń qolymen jasalǵan. Turyp jatqan baspana, ǵımaratty da qarapaıym qurylysshylar salǵan. Al dittegen jerimizge ýaqytyly keshikpeı barýymyz jolaýshy tasymaly qyzmetindegi júrgizýshilerdiń eńbeginiń arqasy. Qysqasy adamzatqa qyzmet etip, kerektiniń bárimen qamtamasyz etip otyrǵan jumysshylar klasy. Sol sebepti de olardyń kúndiz-túngi eńbegi erlikpen para-par. Jumysshysyn baǵalaǵan el árdaıym ozady. Al qarapaıym eńbekkerge keregi jasaǵan isine saı mańdaı teriniń aqysyn alý, áleýmettik, quqyqtyq turǵydan ózin qorǵanyshta ekenin seziný. Elimizde júzege asyp jatqan «Ádiletti Qazaqstan» tujyrymdamasynyń kózdegen maqsaty da osy. Iаǵnı árbir jumysker óziniń eńbegine qaraı laıyqty ári ádil baǵalanǵanyn qalaıdy. Bul máselede álemde úlgi bolǵan memleketter jeterlik. Máselen Japonııada qarapaıym kóshe tazalaýshylardyń aılyǵy eń joǵary jalaqylardyń qataryna kiredi eken. Sondyqtan bul elde jumysshy mamandyǵyna degen kózqaras erekshe. Qazaqstan da keleshekte jumysshy mamandyǵyn qadirlegen qýatty memleket bolaryna senim mol. Eń bastysy sol maqsat jolyndaǵy alǵan baǵytymyzdan taımaýymyz kerek.
