Aqtóbe qalasynda ótken kórmege qatysýshylar jetekshi otandyq ýnıversıtetter men sheteldik joǵary oqý oryndarynyń elimizdegi fılıaldarynyń ókilderimen betpe-bet tildesip, oqýǵa túsý sharttary, bilim baǵdarlamalary, 2025 jylǵy UBT erekshelikteri, memlekettik granttar týraly jan-jaqty aqparat aldy. Kórme aıasynda oqýshylar Ǵylym jáne joǵary bilim mınıstriniń keńesshisi Rýslan Emelbaevpen, Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhanmen, MDSG jobasynyń batys aımaǵyndaǵy joba jetekshisi Erkin Eserkepovpen kezdesip, kásibı baǵyt-baǵdar alýǵa múmkindik aldy. Mamandar oqýshylarǵa mamandyq tańdaý men bolashaq bilim jolyn josparlaý jóninde qundy keńester berdi.
Kórme odan keıin Atyraý qalasynda jalǵasty. Bul joly H.Dosmuhamedov atyndaǵy Atyraý ýnıversıtetinde uıymdastyrylǵan is-sharaǵa alǵashqy kúni myńnan astam oqýshy men ata-ana kelip, ýnıversıtet ókilderimen júzdesti. «Atyraýmen kórshiles jatqan Aqtóbede bıyl ekinshi jyl qatarynan brıtandyq Herıot-Ýott ýnıversıteti 400-ge jýyq stýdentke bilim berip jatyr. Osyndaı 20-dan astam sheteldik oqý ornynyń fılıaldary jáne elimizdegi ýnıversıtetterdiń ókilderi Atyraýǵa kelip otyr. Basty maqsat – óńirdegi ata-analar men oqýshylarǵa elimizdegi múmkindikterdi kórsetý. Bıyl mınıstrlik Atyraýǵa qosymsha taǵy da 500 grant bólip otyr. Sondaı-aq talapkerler sheteldik ýnıversıtetterdiń fılıaldarynda memlekettik grant negizinde oqı alady», dedi Ǵylym jáne joǵary bilim mınıstriniń keńesshisi Rýslan Emelbaev.
Kórmeniń negizgi maqsaty – Qazaqstan aýmaǵynan shyqpaı-aq sheteldik joǵary oqý oryndarynyń bilim berý baǵdarlamalaryna qol jetkizý múmkindigin keńeıtý. Qazirgi tańda elimizdiń túrli óńirlerinde álemniń ozyq ýnıversıtetterimen baılanys ornatylyp, qos dıplom negizinde bilim alýǵa jol ashylǵan. Aldaǵy ýaqytta sheteldik oqý oryndarynyń fılıaldaryn kóbeıtý kózdelip otyr. Kórme aıasynda sheteldik ýnıversıtet fılıaldarynyń artyqshylyqtaryn túsindiretin sheberlik sabaqtary men mamandyq tańdaýǵa baǵyt beretin ınteraktıvti kezdesýler uıymdastyryldy. Sonymen qatar túrli vıktorınalyq oıyndar ótip, oqýshylar belsendilik tanytty. Kórmege kelgen Almaly orta mektebiniń oqýshysy Aqtoty Baqtybaeva kóp suraqqa jaýap alǵanyn aıtady. «2025 jyly Almaly orta mektebin bitiremin. Kórmede túrli ýnıversıtetterdiń erekshelikterin, basqa oqý oryndarynan qandaı aıyrmashylyqtary bar ekenin bildik. Sonymen qatar memlekettik bilim granty negizinde oqýǵa qoıylatyn talaptar týraly tolyq aqparat aldyq», dedi.
«Study in Kazakhstan» kórmesi aldaǵy ýaqytta elimizdiń basqa óńirlerinde de jalǵasady. Uıymdastyrýshylardyń aıtýynsha, mundaı is-sharalar jastardyń bilimge degen yntasyn arttyryp, olardyń durys tańdaý jasaýyna septigin tıgizedi.
