Depýtat salyq kodeksiniń jaı ǵana sandar men paıyzdar emes, adamdardyń ómiri ekenin basyp aıtty. Eń áýeli A. Aımaǵambetov kitap pen baspa isiniń órkendeýine QQS birshama kedergi bolyp turǵanyn jetkizdi.
«Eger QQS-ty tómendetpesek, kitaptar odan saıyn qymbattaıdy. Al balalar tek YouTube pen TikTok kóredi.Fransııa, Japonııa sııaqty elderde kitapqa múlde QQS salynbaıdy nemese úlken jeńildikter bar.Buryn soǵys kezinde adamdar ot ishinen kitapty alyp shyǵatyn. Al biz qazir sol kitapqa salyq salyp otyrmyz. Sondyqtan kitap pen balalarǵa arnalǵan baspa ónimderinen QQS-ty alyp tastaıyq», dedi depýtat.
Kelesi sóz etilgen teatrlar, kitaphanalar, murajaılar men qolóner máselesi.
«Sovet dáýirinen kele jatqan dıvandary men oryndyqtary bar teatrlar, ýaqyttyń taby ótip kitaptary sarǵaıyp bitken kitaphanalar salyq tólemeýi kerek. Olar saýda ortalyqtary emes. Buny bıznes dep oılamaý kerek. Bul bizdiń mádenıet. Sondyqtan mekemelerdi korporatıvtik tabys salyǵynan bosatý qajet», dedi depýtat.
Odan ary qaraı A.Aımaǵambetov dári-dármek haqynda sóıledi.
«Rak, dıabet, sırek kezdesetin aýrýlar — Úkimet bul máselede bizdiń usynysty qoldady. Bul — myńdaǵan otbasy sezinetin mańyzdy qadam. Biraq odan basqa da mańyzdy aýrýlar men dáriler bar. Epılepsııa, psıhıkalyq buzylystar, ınsýlttan keıingi qalpyna kelý — bular da ómir sapasyn anyqtaıtyn jaǵdaılar. Bul — aýrý. Al aýrýǵa salyq salý — ádiletsiz. Qazir 10% QQS ómirlik mańyzdy dárilerge de salynýda. Al bul degenimiz: Kóp balaly otbasyǵa —azyq-túlikti, ınsýlt alǵan qarııaǵa —reabılıtasııany joq deı berý.Eger biz densaýlyq salasynda gýmanıstik salyq saıasatyn bastadyq desek — sońyna deıin barýymyz kerek. Bir shyndyqty aıtý kerek: OSMS júıesi aqsap tur. GOBMP paketiniń aýqymy tarylyp barady.Halyqtyń 40%-y emdelýge óz qaltasynan tóleıdi», dep qadap aıtty.
Odan keıin depýtat transjırge tyıym salyný qajettiligin atap ótti. Bul rak, semizdik, júrek-qan tamyr aýrýlary, dıabetti týdyratynyn, qoǵamdy odan saqtandyrý mańyzdylyǵyn jetkizdi.
Depýtattyń kelesi kótergen máselesi – mýltfılmderge salynatyn salyqtyń kóptigi. «Búginde balalardyń kóbi basqa tildegi TikTok pen Netflix ǵana kóredi. Memlekettik tilde kontent az. Nege? Bizdiń anımasııalyq stýdııalar ár kadr úshin QQS tóleıdi. Qazaqsha mýltfılm shyǵarý — qymbat. Ońtústik Koreıa, Polsha, Fransııa — óz anımasııasyn qorǵaıdy. Bizge de sol qajet», dedi ol.
Aımaǵambetovtyń sońǵy bazynasy kazınolarǵa qarsy aıtyldy. Ol qumar oıyn úılerine salyqty batyl kóterýge shaqyrdy. 20%, 30%, tipti 50% salyq salýdyń esh sókettigi joq ekenin túsindirdi. Sebebi árbir utylǵan bástiń artynda bir otbasynyń úmiti turǵanyn aıtty.
«Bizdiń usynyp otyrǵanymyz — jeńildik emes, ádilettilik. Salyq júıesi muqtajǵa demeý bolýy tıis. Smartfon — kitaptan arzan bolmaýy kerek. Energetıkalyq sýsyn — sýdan arzan bolmaýy kerek», dep aıaqtady sózin A.Aımaǵambetov.
