«Súıegi asyl» degen teńeýdi Allabergen aqsaqalǵa qarata aıtsaq, ábden jarasary haq. Qarııa Atbasar aýdanynyń týmasy, 1935 jyly ómir esigin ashqan. Balalyq shaǵy sum soǵysqa tap kelip, qarshadaıynan eńbek maıdanyna aralasty. Býyny qatpaı jatyp, mal da baqty, shóp te shapty, arba aıdady.
«Biz qansha qıyndyq kórsek te moıymadyq. Jeńis úshin kúni-túni eńbek etip, eresektermen qatar úles qostyq. Maıdanǵa attanǵan úlkenderdiń ornyn joqtatpaýǵa tyrystyq. Anamyzǵa, kishkentaı baýyrlarymyzǵa tirek boldyq», deıdi qarııa.
Kópten kútken Jeńis te keldi. Orta bilimmen shektelip qalmaý kerek ekenin túsingen bozbala Almatydaǵy zooveterınarlyq ınstıtýtqa túsip, úzdik bitirdi. Beıbit kúnniń ár sátin baǵalap, óz salasy boıynsha aıanbaı ter tókti. Týǵan jerinde shopandar brıgadasyn quryp, joǵary kórsetkishterge qol jetkizdi. Eńbegi eleýsiz qalǵan joq, ozyq shopan retinde delegasııa quramynda elimizdiń sol kezdegi astanasy – Almatyǵa, tipti sonaý Fransııaǵa deıin baryp qaıtty. Parıj, Marsel, Antıb, Nıssa, Kann qalalaryna deıin saparlaǵanyn saǵyna eske alady.
«1962 jyly Tyń ólkesine KSRO bas hatshysy Hrýshev keldi, sol kezdegi Selınogradta sezd ótti. Men eńbek ozaty retinde sóz alyp minbege shyqtym. Hrýshev te sóıledi, meniń eńbegimdi, jaqsy sóılegenimdi atap ótti», deıdi aqsaqal.
1963 jyly ozattar sapynda Máskeýge shaqyrylǵan Allabergen Ahmetjanov «Eren eńbegi úshin» medalimen marapattaldy. Joǵary nagradany oǵan bas hatshy Hrýshevtiń ózi tapsyrypty.
Eńbek ozatynyń baı tájirıbesi men úlgili ómiri týraly telearnalar men gazetter jarysa jazǵanyn da atap ótken jón. Tipti sonaý Máskeýden kınodokýmentalıster kelip, arnaıy túsiripti.
«Meniń qoı sharýashylyǵyndaǵy tyń tájirıbelerimdi aýdandyq jáne oblystyq partııa komıteti qoldap, aqyry respýblıkaǵa jaıyldy. О́ńirlerdegi kolhoz, sovhozdarda shopandar brıgadasy quryldy. Men qaı jerde júrsem de jastardy erinbeı jumys isteýge, joǵary bilim alýǵa shaqyrdym, aýyl sharýashylyǵyn sapaly mamandarmen tolyqtyrýǵa úles qostym. Az jylda bizdiń Atbasar aýylynan birneshe adam joǵary bilim alyp, sovhozdarǵa zootehnık bolyp ornalasty. Jemisti eńbek etip, abyroıǵa bólendi», deıdi aqsaqal.
«Erdi eńbek jetkizer» deıdi qazaq. Jastaıynan qyzý eńbekke aralasqan Allabergen aqsaqal bar muratyn osy joldan tapty. Jurtshylyqtyń qurmetine bólendi, tabysqa keneldi. Kóptegen joǵary marapattarǵa ıe boldy. El ıgiligi jolynda aıanbaı jumys istep, 1983 jyly qurmetti eńbek demalysyna shyqty.
Búginde Allabergen Ahmetjanov 6 baladan taraǵan 12 nemereniń, 11 shóbereniń ardaqty atasy. Balalary men nemereleriniń barlyǵy joǵary oqý ornyn bitirip, ómirden óz ornyn tapty, shóbereleri de jetilip keledi. О́zi urpaǵynyń balalary men nemereleriniń ortasynda, Astanada turady.
«Jasym seksenge taıaǵanda Mekkege qajylyq sapar jasadym. Qudaıdan elimiz úshin, áýletim úshin baqýatty ári tynysh ómir suradym. Urpaǵymyz baqytty bolsyn dep tiledim», deıdi qarııa.
Jeńis kúni qarsańynda toqsan jyldyq torqaly toıymen quttyqtap kelgen «Qazqurylysjúıesi» mekemesiniń qyzmetkerlerin Allabergen ata qýana qarsy aldy. Jasy birazǵa kelse de eńsesi tik, sanasy sergek, oıy nyq, sózi jatyq. Irgeli ujymnyń ózine jasaǵan syı-sııapatyna alǵysyn aıtyp, aq batasyn berdi.
