Foto: N.Baıbýlın.
Suhbat kezinde taraptar Senat pen Konsýltatıvtik keńes arasyndaǵy yntymaqtastyqty jáne rýhanı dıplomatııany nyǵaıtý máselelerin talqylady. Sondaı-aq aldaǵy kezeńge arnalǵan birlesken jumystyń mańyzdy mindetterine nazar aýdardy.
Máýlen Áshimbaev Konsýltatıvtik keńestiń Tóraǵasymen kezdesýde Saýd Arabııasy Qazaqstannyń mańyzdy strategııalyq seriktesteriniń biri ekenin atap ótti. Dıplomatııalyq qatynastar ornaǵan 30 jyl ishinde eki memleket arasyndaǵy yntymaqtastyq nyǵaıyp, ózara mazmundy ári ashyq saıası dıalog qalyptasty. Buǵan joǵary deńgeıdegi ekijaqty belsendi baılanystyń nátıjesinde qol jetkizilgeni anyq.
«Qazirgi tańda eki el arasyndaǵy yntymaqtastyq barlyq salada qarqyndy damyp keledi. Bul rette Qazaqstan Prezıdenti Qasym-Jomart Kemeluly Toqaev pen Qos Kıeniń Saqshysy – Korol Salman ben Ábdelazız Ál-Saýd jáne Taq murageri, Premer-Mınıstr Muhammed ben Salman ben Ábdelazız Ál-Saýd arasyndaǵy ózara qurmet pen dostyqqa, ortaq qundylyqtar men ustanymdarǵa negizdelgen qarym-qatynas sheshýshi ról atqarady. Osy rette sizge Qazaqstan-Saýdııa qarym-qatynasyn nyǵaıtýǵa, sondaı-aq, Álemdik jáne dástúrli dinder kóshbasshylary seziniń ıdeıalaryn dáripteýge qosqan úlesińiz úshin zor rızashylyǵymyzdy bildiremiz», dedi Máýlen Áshimbaev.
Sonymen qatar Senat Spıkeri Senat pen Keńes arasyndaǵy baılanystardy odan ári nyǵaıtýdyń mańyzdy ekenin tilge tıek etti. Kezdesýde zańnamalyq qyzmette tájirıbe almasý, dostyq toptaryna múshe depýtattardyń ózara saparlaryn uıymdastyrý jáne Parlament Senaty men Konsýltatıvtik keńestiń salalyq komıtetteri arasynda tyǵyz baılanys ornatý baǵytyndaǵy birlesken jumys máseleleri de talqylandy.
«Qazaqstan men Saýd Arabııasy arasyndaǵy yntymaqtastyqty damytý jolynda Senat pen Konsýltatıvtik keńestiń ózara dıalogy mańyzdy ról atqarady. Osy oraıda Saýd Arabııasynyń Konsýltatıvtik keńesimen is-qımyldy odan ári arttyrýǵa múddeli ekenimizdi atap ótkim keledi. Bizdi Koroldikte iske asyrylyp jatqan bastamalardy zańnamalyq turǵydan qamtamasyz etý salasyndaǵy tájirıbe qyzyqtyrady. Osy oraıda Senat pen Konsýltatıvtik keńeste qurylǵan dostyq toptary aıryqsha ról atqaratynyn atap ótken jón. Olardyń áleýetin ózara dıalogty nyǵaıtýdyń tıimdi tetigi retinde barynsha qoldanǵan abzal. Sondaı-aq salalyq komıtetter arasyndaǵy baılanystardy da jandandyrýdyń mańyzy zor», dedi Senat Tóraǵasy.
Suhbat barysynda Máýlen Áshimbaev Koroldiktiń azyq-túlik qaýipsizdigine qatysty qazirgi syn-qaterlerdi eńserýge jáne ornyqty damýdy ilgeriletýge arnalǵan bastamalaryn, sondaı-aq, Azyq-túlik qaýipsizdigi jónindegi Islam uıymy men Islam yntymaqtastyǵy uıymy aıasyndaǵy irgeli isterin joǵary baǵalady.
Senat Spıkeri óz sózinde el Prezıdenti Qasym-Jomart Toqaevtyń bastamasymen júrgizilip jatqan saıası jáne áleýmettik-ekonomıkalyq salalardaǵy keshendi ózgeristerge de jan-jaqty toqtaldy. Bul rette ekonomıkany ártaraptandyrý, sıfrlandyrý, óńdeý ónerkásibin damytý jáne ınfraqurylymdy jańǵyrtý baǵytyndaǵy tyń sharalar jóninde sóz boldy.
О́z kezeginde Abdalla ben Muhammed ben Ibrahım Ál-Ash-Sheıh Saýd Arabııasy Konsýltatıvtik keńesi kópjaqty qatynastardy damytýǵa múddeli ekenin aıtyp, Qazaqstanda júrgizilip jatqan saıası jańǵyrýlardyń tıimdiligine nazar aýdardy.
Kezdesýde saýda-ekonomıkalyq jáne ınvestısııalyq yntymaqtastyq máseleleri, onyń ishinde eki tarap ta qyzyǵýshylyq tanytqan salalarda ınvestorlarǵa arnalǵan qolaıly jaǵdaılar keńirek talqylandy.
Sondaı-aq búgin Máýlen Áshimbaev Saýd Arabııasynyń Islam isteri, ýaǵyz jáne nasıhat mınıstri Abdýlatıf ben Abdelazız ben Abdrahman Ál-Ash-Sheıhpen kezdesti. Onda taraptar konfessııaaralyq dıalogty damytý máseleleri men perspektıvalaryn talqylady. Álemdik jáne dástúrli dinder kóshbasshylary Sezi Hatshylyǵynyń Basshysy atap ótkendeı, Saýd Arabııasy toleranttylyq pen konfessııaaralyq dıalogty nyǵaıtýǵa jáne Sezd ıdeıalaryn dáriptep, qoldaýǵa úlken úles qosyp keledi. Máýlen Áshimbaev mundaı qadam qazirgideı shıelenise túsken turaqsyzdyq jaǵdaıynda aıryqsha mańyzǵa ıe ekenin atap ótti.
«Qazir álem geosaıası qaqtyǵystar jáne saýda soǵysy sııaqty úlken syn-qaterlermen betpe-bet kelip otyr. Sondaı-aq biz ártúrli kúshterdiń osyndaı halyqaralyq shıelenisti paıdalanyp, radıkaldy ıdeologııany nasıhattaýǵa, ksenofobııany odan ári qozdyrýǵa jáne jek kórýshilikti taratýǵa umtylyp jatqanyn kórip otyrmyz. Mundaı jaǵdaıda rýhanı dıplomatııany ilgeriletý jáne dinı kóshbasshylardyń kelisim men dıalogqa shaqyrýy mańyzdy ról atqarady. Sondyqtan Saýd Arabııasyna sapar aıasynda Dúnıejúzilik ıslam lıgasymen birlesip, dinaralyq dıalogty nyǵaıtý máselelerine arnalǵan dóńgelek ústel uıymdastyryp jatyrmyz. Bul is-sharalar halyqaralyq deńgeıde dıalog mádenıetin dáripteýge óz úlesin qosady dep úmittenemiz», dep, Máýlen Áshimbaev suhbattasýshyǵa bıylǵy qyrkúıekte Astanada ótetin Álemdik jáne dástúrli dinder kóshbasshylarynyń VIII Sezine daıyndyq barysy týraly aıtyp berdi.
О́z kezeginde, Abdýlatıf ben Abdelazız ben Abdrahman Ál-Ash-Sheıh Sezd aıasyndaǵy bastamalarǵa qoldaý bildirip, búginde forým ıdeıalarynyń mańyzy jahandyq deńgeıde artyp kele jatqanyn aıtty. Sondaı-aq ol ózara baılanysty nyǵaıtý jáne rýhanı dıplomatııany damytý jolyndaǵy yntymaqtastyqty odan ári jandandyrýǵa daıyn ekenin jetkizdi.
Budan basqa, Qazaqstan delegasııanyń músheleri Neon jobasynyń iske asyrylý barysymen tanysty. Atalǵan joba aıasynda qaladaǵy ekologııalyq júktemeni azaıtýdy jáne «jasyl» energetıkany barynsha paıdalanýdy kózdeıtin iri megapolıs salý josparlanyp otyr. Onyń jalpy aýdany 26 500 sharshy shaqyrymdy quramaq.
