Bul joba Qazaqstan Respýblıkasynyń Prezıdenti Qasym-Jomart Toqaevtyń tapsyrmasyna sáıkes júzege asyryla bastaǵan. Memleket basshysy kólik-logıstıkalyq sektordy damytý – memlekettiń strategııalyq basym baǵyty ekenin birneshe márte aıtqan bolatyn.
О́ńirde Oral men Aqsaı qalalaryndaǵy jáne Shyńǵyrlaý men Semıglavyı Mar beketteri jańartylatyn boldy. Bul nysandardyń qaı-qaısynyń da tarıhı orny bar, aımaq halqy úshin mańyzdy ról atqarady. Búginde oblysta osy beketter arqyly 7 baǵytqa qyzmet kórsetetin 14 poıyz júredi.
Árıne, bul vokzaldardyń eń irisi – Oral qalasynda 1983 jyly salynǵan temirjol vokzaly. Onyń aýdany 5716,1 sharshymetr, beket arqyly táýligine 900 jolaýshy óte alady. Aqsaı qalasynda 1937 jyly salynǵan temirjol vokzaly da kónerip turǵan edi, buıyrtsa qaıta jóndeýden ótedi. О́ńirdegi eń kóne vokzaldyń biri – 1916 jyly salynǵan Semıglavyı Mar stansasy men 1936 jyly salynǵan Shyńǵyrlaý stansasy da jobaǵa engizilip, rekonstrýksııadan ótýi tıis.
Vokzaldardy jóndeý jumysyna start bergen Batys Qazaqstan oblysynyń ákimi Narıman Tóreǵalıev júzege asyrylyp jatqan jobanyń óte mańyzdy ekenin atap aıtty. «Vokzaldardy jóndeýdiń bastalýy – oblys ınfraqurylymyn damytýdaǵy mańyzdy kezeń. Memleket basshysynyń tapsyrmasyna sáıkes biz negizgi kólik nysandaryn jańartý boıynsha keshendi jumysty bastadyq. Bul jolaýshynyń jaǵdaıyn jaqsartyp qana qoımaı, oblys ekonomıkasy men logıstıkasynyń damýyna da septigin tıgizedi», dedi Narıman Tóreǵalıev.
Mine, «Qazaqstan temir joly» Ulttyq kompanııasynyń tapsyrysymen merdiger «KazConstructionGroup» JShS Oral vokzalyn jańǵyrtýdy bastap ta ketti. Jumys bıylǵy qyrkúıek aıynda aıaqtalýy tıis. Temirjol vokzaly sońǵy ret 2012 jyly kúrdeli jóndeýden ótken eken. Jańa joba barysynda temirjol vokzaldaryndaǵy jaılylyq pen qaýipsizdik deńgeıi de edáýir artady. Sondaı-aq servıstik qyzmet kórsetý sapasy jaqsaryp, jolaýshylar úshin barynsha qolaıly jaǵdaı jasalmaq.
Jóndeý barysynda vokzaldardyń syrty da, ishi de jańartylady. Ǵımarattardyń sáýleti qazirgi zamanǵa laıyqtalyp, ishki keńistikter de aıtarlyqtaı ózgeriske ushyraıdy. Eń bastysy olar jolaýshyǵa yńǵaıly ári qaýipsiz bolady.
Batys Qazaqstan oblysy
