Foto: dknews.kz
Qazaqstan Eýrazııanyń týrıstik kartasynda óz mártebesin nyǵaıtyp keledi. Byltyrdyń ózinde Úndistannan kelýshiler sany eki esege jýyq artyp, 78 myńnan 146 myńǵa jetken. Muny elimizdiń týrıstik áleýetin shetelde ilgeriletý jumystarynyń nátıjesi dep baǵalasaq bolady. Mysaly jýyrda Kazakh Tourism jáne Air Astana kompanııalary Úndistannyń jetekshi týroperatorlaryna arnaıy tanystyrý týryn uıymdastyryp, taǵy bir bastamaǵa uıytqy boldy.
Úndistan týroperatorlarynyń elge sapary «Mýmbaı – Almaty» jańa tikeleı áýe baǵdarynyń iske qosylýyna oraı uıymdastyrylǵan. Alǵashqy reıs ońtústik astanaǵa sátti qonyp, qonaqtar Almaty qalasy men Almaty oblysynyń kórikti jerlerin aralaýǵa attanypty. Baǵdarlamada «Kóktóbe», «Shymbulaq» taý-shańǵy kýrorty, «Sharyn» shatqaly, Kólsaı men Qaıyńdy kólderi jáne ózge de týrıstik nysandar qamtylǵan. Tanystyrý sapary Úndistan týroperatorlaryna óńirdiń týrıstik áleýetin baǵalaýǵa jáne saıahatshylarǵa usynatyn baǵyttardy keńeıtýge jol ashady dep úmittenemiz.
Aıta keteıik, Úndistannyń eń iri megapolısimen tikeleı áýe reıs aptasyna úsh márte qatynaıdy. Mýmbaıdan ushaq sársenbi, juma jáne jeksenbi kúnderi ushsa, Almatydan keri reıster sársenbi, beısenbi jáne jeksenbi kúnderi kókke kóteriledi.
