Is-shara ulttyq termınologııalyq júıeni jetildirýge, birizdendirýge, ulttyq zańnamada quqyqtyq termınderdi qoldaný barysynda týyndaıtyn máselelerdi anyqtaýǵa baǵyttaldy. Semınardy Ǵylym jáne joǵary bilim mınıstrliginiń Til saıasaty komıteti jáne Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy uıymdastyrdy.
Jıynda ǵalymdar men mamandar zań termınderi men zańdyq tehnıkany memlekettik tilde damytýdyń qoldanbaly jáne teorııalyq aspektilerin, sondaı-aq negizgi ǵylymı ustanymdardy egjeı-tegjeıli talqylady. Odan bólek normatıvtik quqyqtyq aktilerdegi salalyq termınderdi odan ári jetildirý, ulttyq quqyqtyq júıe negizinde zańdyq tildi qalyptastyrý, termınologııalyq qoldanys tizbesine saraptamalyq taldaý jasaý, salalyq termınologııany damytý jáne t.b. máselelerdi qarady.
Qatysýshylar atap ótkendeı, zań shyǵarý tehnıkasynyń negizgi erejeleriniń biri – qujattyń quqyq qoldanýshyǵa ǵana emes, kez kelgen azamatqa túsinikti bolýy. Bul máseleler osy saladaǵy biryńǵaı sózdikti ázirleýdiń asa ózektiligin jáne onyń tizbesin sala mamandarymen jan-jaqty talqylaý qajettigin kórsetedi.
Semınar qorytyndysy boıynsha zańnamalyq salada termınologııalyq bazany qalyptastyrý boıynsha praktıkalyq usynymdar berildi.
