Foto: ashyq derekkóz
Ol Sý kodeksiniń baptaryna jáne Úkimettiń 2004 jylǵy qaýlysyna sáıkes, erekshe memlekettik mańyzy bar sý obektileri tizimine Kaspıı teńizi, Balqash, Zaısan, Alakól kólderi men Ertis ózeni engizilgenin, alaıda buǵan Jaıyq ózeni kirmegendigin aıtyp ótti.
«2023 jylǵy mamyr aıynda joldaǵan depýtattyq saýalyma jaýap retinde Premer-Mınıstr gıdrogeologııalyq zertteýler nátıjesi boıynsha bul másele qaıta qaralatynyn málimdegen bolatyn. Qazir zertteýler aıaqtaldy, 51 mıllıon teńgeden astam memlekettik qarajat jumsaldy. Alaıda másele áli de sheshimin tapqan joq. Sonymen qatar, 2021-2024 jyldarǵa arnalǵan Qazaqstan-Reseı Jaıyq ekojúıesin qalpyna keltirý baǵdarlamasynyń merzimi aıaqtalǵanymen, jańa baǵdarlama áli bekitilmedi. Bul jaǵdaı óńirdegi sý qaýipsizdigi daǵdarysynyń ýshyǵýymen qatar kelip otyr», dedi sheneýnik.
Bul máselege jurtshylyq alańdap otyr. О́ıtkeni depýtattyń aıtýynsha, ónerkásipte sýdy qaıtalama aınalymǵa engizý júıesiniń bolmaýy, sý qoımalarynyń kelisilmeı salynýy, lastaný deńgeıiniń artýy jáne ekojúıeniń buzylýy túıtkildi túıin bolyp tur.
Osyǵan baılansty D. Turǵanov tómendegi usynystardy jetkizdi:
- Jaıyq ózenin erekshe memlekettik mańyzy bar sý obektileri tizbesine engizý týraly máseleni shuǵyl túrde qaıta qarap, tıisti sheshim qabyldaý.
- Jaıyq ekojúıesin qalpyna keltirý jónindegi jańa keshendi Qazaqstan-Reseı baǵdarlamasyn ázirlep, bekitý.
- Jaıyq ózeni boıyndaǵy iri ónerkásiptik kásiporyndardyń sý paıdalanýyna memlekettik baqylaýdy kúsheıtý.
- Jaıyq ózeni alabynda kelisilmegen jasandy sý qoımasyn salýǵa qatań tyıym salý.
