Foto: Zakon.kz
Prezıdent málimdemesinde Jeńis kúniniń taǵylymy tek ótken tarıhty eske alý ǵana emes, búgingi álemdegi beıbitshilikti saqtaý jolyndaǵy basty sabaq ekenin aıtty.
«Uly Jeńistiń taǵylymy barsha halyqqa, ásirese, saıasatkerlerge ksenofobııaǵa, násildik jáne ulttyq ústemdikke, halyqaralyq quqyq qaǵıdattaryn qurmettemeýge qurylǵan jaýapkershilikten jurdaı saıasat júrgizýdiń saldary qandaı qasiretke ákeletinin áli kúnge deıin kórsetip otyr», dedi Qasym-Jomart Toqaev.
Memleket basshysy jýyrda Respýblıkalyq onomastıkalyq komıssııanyń sheshimimen elimizdegi 500-den astam kóshege buǵan deıin eskerýsiz qalǵan jergilikti maıdangerler men erlerdiń esimderi beriletinin habarlady. Ásirese, jańa jáne ataýy qaıtalanatyn kóshelerge basymdyq berilmek.
«Bul sheshim – Uly Jeńisti, oǵan qatysýshylardy qanshalyqty qadir tutatynymyzdy kórsetetin mańyzdy qadam. Uly Jeńis týraly umytpaý degenimiz, bul – eń aldymen, erjúrek batyrlarymyzdy jadymyzda saqtaý, olardyń janqııarlyq eńbegi men erligin, paryzǵa adal jáne antqa berik bolǵanyn umytpaý degen sóz», dedi Prezıdent.
Sonymen qatar Prezıdent bıylǵy mereıtoıǵa daıyndyq 2023 jyldyń ózinde bastalǵanyn atap ótip, «Uly Jeńis: erlikke taǵzym, urpaqqa úlgi» atty keshendi jospar aıasynda 2 myńnan astam mádenı, ǵylymı-zertteý jáne aǵartýshylyq is-sharalar ótkizilip jatqanyn jetkizdi. Bul bastamalar el ishinde ǵana emes, shet memleketterdegi qazaq dıasporalary men halyqaralyq qaýymdastyqtar arasynda da qoldaý tabýda.
Memleket basshysy mereıtoıdyń sharyqtaý shegi retinde aýqymdy áskerı sherý ótetinin málimdedi. Bul sherýdiń máni tek saltanatty sıpatta ǵana emes, qazirgi kúrdeli geosaıası jaǵdaıdaǵy Qazaqstannyń ulttyq birligi men rýhynyń myzǵymas myqtylyǵyn pash etýde jatyr.
«Túptep kelgende, bul áskerı sherýdiń mán-mańyzy zor bolmaq. Sebebi muny bir jaǵynan maıdangerler men tyńgerlerge taǵzym desek, ekinshi jaǵynan qazirgi kúrdeli geosaıası ahýalda ulttyq rýhymyzdyń myqtylyǵyn kórsetetin sımvol deýge bolady», dedi Memleket basshysy.
Jeńistiń 80 jyldyǵyna arnalǵan is-sharalar mamyr aıynyń alǵashqy kúnderinen bastalyp, búkil el aýmaǵynda keń kólemde ótedi.
