Saltanatty sharaǵa qatysqan oblys ákiminiń orynbasary Áset Masabaevtyń aıtýynsha, turaqty gazben jabdyqtaý – aýyldyń áleýmettik-ekonomıkasyna oń serpin beredi.
«Gazdyń paıda bolýy shaǵyn bıznesti damytýǵa, óndiris ashýǵa, ınvestısııa tartýǵa múmkindik týǵyzady. Bul turaqty ósý men jumyspen qamtýǵa baǵyttalǵan qadam. Gaz Qazybek bek aýylynan bólek, taǵy da bes aýyldy qamtıdy», - dep atap ótti oblys ákiminiń orynbasary.
Gaz qubyrlaryn júrgizý jumystary 2023 jyldyń jeltoqsanynda bastalyp, byltyrǵy jyldyń sońynda aıaqtaldy. Negizinen keste boıynsha qurylysqa 26 aı berilgen bolatyn. Jumys josparlanǵan ýaqyttan da erte aıaqtaldy. Jobanyń jalpy quny – 4,2 mlrd teńgeni qurady.
Jergilikti turǵyndar jobanyń júzege asatynyna uzaq ýaqyt senbegenderin jasyrmady. Sebebi, aýylda bul qubyrlar 2011 jyldan beri jatqan eken, al ony iske qosý únemi keıinge qaldyrylyp kelipti.
«Budan bylaı bizdiń úıimiz jyly ári taza bolady. Endi kómir jaǵyp, otyn jaryp, pesh tazalap júrmeımiz. Burynǵydan qaraǵanda qolaıly jaǵdaı jasaldy», – deıdi qýanyshymen bólisken kópbalaly ana Álııa Tursynova.
Qazybek bektiń tarıhy – óńirdi gazdandyrýdyń aýqymdy baǵdarlamasyndaǵy bir ǵana mysal. Qazirgi ýaqytta, óńirlik syzba aıasynda 157 eldi meken kógildir otynǵa qosylyp, 1,2 mln adamdy qamtydy. Bul oblystyń jalpy halqynyń 77%-yn quraıdy.
О́tken jyly 17 aýyl gazben qamtyldy. Al osy jyldyń sońyna deıin gazdandyrý deńgeıin 59,5%-ǵa (169 eldi meken) deıin jetkizý josparlanyp otyr. Bıyl jańa jobalardy iske asyrýǵa 6,7 mlrd teńgeden astam qarajat qarastyryldy. Taǵy 1,4 mlrd teńgesi jobalyq-smetalyq qujattamany daıyndaýǵa baǵyttaldy.
Jumystar Qonaev, Balqash, Jambyl jáne Ile aýdandarynda júrgizilip jatyr. Bılik jobanyń naqty qajettilikter men turaqty damý qaǵıdattaryn eskere otyryp, kezeń-kezeńimen júzege asyrylatynyn atap aıtty.
О́ńirdi gazdandyrý 2030 jylǵa deıin tolyq aıaqtalady dep josparlanyp otyr. Bul turmystyq jaǵdaılardy jaqsartýǵa ǵana emes, sonymen qatar ekologııaǵa júktemeni azaıtýǵa, ekonomıkalyq ósýge jáne aýyldyq jerlerge ınvestısııalar tartýǵa jaǵdaı jasaýǵa múmkindik beredi.
Almaty oblysy.
