Foto: MQIA Baspasóz qyzmeti
Jıynǵa Kólik prokýratýrasynyń, Kólik jáne Ishki ister mınıstrlikteriniń, Tehnıkalyq retteý jáne metrologııa komıtetiniń, sondaı-aq «Azamattarǵa arnalǵan úkimet» memlekettik korporasııasynyń ókilderi qatysty.
Otyrysta halyqaralyq avtokólik tasymaldary jáne kólik quraldaryn tirkeý salasyndaǵy memlekettik qyzmetterdiń sapasy qaraldy. Agenttik júrgizgen baqylaý nátıjesinde bul baǵytta 1800-den astam quqyqbuzýshylyq anyqtalǵan. Olardyń qatarynda qyzmet kórsetý merzimderiniń saqtalmaýy, artyq qujattar talap etilýi, negizsiz bas tartýlar jáne reglament talaptarynyń buzylýy sııaqty máseleler bar.
Talqylaý barysynda ótinimderdi qaraý merziminiń keshigýine ákelip otyrǵan birqatar júıeli túıtkilderge nazar aýdaryldy. Atap aıtqanda, aqparattyq júıelerdegi jıi tehnıkalyq aqaýlar, ýákiletti organdar men tasymaldaýshylar arasyndaǵy ózara is-qımyldyń jetkiliksiz ashyqtyǵy jáne úılesimsizdigi sóz boldy.
Keńes qorytyndysy boıynsha aqparattyq júıelerdiń turaqty jumysyn qamtamasyz etý, olardy ıntegrasııalaý jáne vedomstvoaralyq ózara is-qımyldy jetildirý jóninde naqty usynystar aıtyldy.
Aıta keteıik, Memlekettik qyzmet isteri agenttigi memlekettik qyzmet kórsetý sapasyn arttyrý jáne qyzmet alýshylardyń quqyqtaryn qorǵaý baǵytyndaǵy júıeli jumysyn jalǵastyra bermek.
