Jıynda sóz alǵan Málik Otarbaev Memleket basshysy atap ótken basym baǵyttarǵa toqtalyp, olardy júzege asyrýdaǵy bilim men ǵylymnyń róline erekshe mán berdi. Sonymen qatar, ol sıfrlandyrý, jasandy ıntellekt, kólik-logıstıka, energetıka, agroónerkásip jáne adam kapıtalyn damytý syndy tórt negizgi baǵyttyń elimizdiń ınnovasııalyq damýyna negiz bolatynyn atap ótti.
«Qoǵamda zań men tártipti saqtaý, mádenıetti damytý, ǵylym men bilimge ınvestısııa salý, tarıhı ádildikti qalpyna keltirý jáne ulttyq birlikti nyǵaıtý – qazirgi kezeńdegi mańyzdy mindetter. Bul baǵyttardyń barlyǵy el damýynyń tuǵyrly tiregi. Atalǵan salalardy jasandy ıntellektpen ushtastyra otyryp, Qazaqstan tek aımaqtyq emes, jahandyq tehnologııalyq kóshbasshylardyń qataryna qosyla alady. Osyǵan baılanysty Prezıdent Úkimetke ozyq sıfrlyq sheshimder men jasandy ıntellektige qolaıly ekojúıe qalyptastyrýdy jedeldetýdi tapsyrdy», dedi Prezıdent keńesshisi.
Kezdesý barysynda belgili tarıhshy, Salqynbek Dosaly Isahanuly «Ulttyq quryltaı jáne rýhanı qundylyqtar» taqyrybynda óz oıyn bólisti. Ol ulttyń rýhanı tutastyǵy eń aldymen tilden bastalatynyn Konfýsııdiń taǵylymdy támsili arqyly jetkizdi. «Tili buzylǵan ulttyń rýhy álsireıdi, al rýhy álsiregen qoǵamda ádilet pen aqıqat joǵalady. Mundaı qaýipten saq bolý – barshamyzdyń boryshymyz. Qazirgi aqparattyq maıdan kezinde ulttyq tárbıe men qundylyqtardy saqtaý, dáripteý – ár azamatqa júktelgen amanat», dedi tarıhshy.
Talqylaýǵa qatysqan ýnıversıtet ǵalymdary men jas zertteýshiler qoǵam men óndiristiń órkendeýine yqpal etetin ózekti ǵylymı-tehnıkalyq máseleler boıynsha pikir almasty.
