«Qazaqstan Respýblıkasy Ulttyq Olımpıdalyq komıteti ujymynyń atynan jáne jeke óz atymnan orny tolmas aýyr qaıǵyǵa baılanysty shyn júrekten kóńil aıtamyn.
Bul – búkil sport qaýymdastyǵy úshin ǵana emes, onyń shákirti retinde men úshin de aýyr qaza. Vıktor Konstantınovıch tek úzdik jattyqtyrýshy ǵana emes, naǵyz tálimger, ustaz, úlgi bolatyn jan edi. Onyń sportqa degen adaldyǵy, kásibıligi jáne árbir sportshyǵa erekshe kózqaraspen qaraı bilýi bizdiń jadymyzda máńgi saqtalady. Ol Qazaqstandaǵy bokstyń damýyna ólsheýsiz úles qosyp, tutas bir daryndy sportshylar býynyn tárbıelep shyǵardy.
Oryn tolmas aýyr qazaǵa baılanysty shyn júrekten kóńil aıtamyn. Onyń jarqyn beınesi júregimizde máńgi saqtalady», - deıdi Gennadıı Golovkın.
Aıta keteıik, Vıktor Dmıtrıev 1953 jyly 26 shildede Qaraǵandyda dúnıege kelgen. Áskerde qyzmet etti. Eńbek jolynda aldymen taý-ken tehnıkýmynda mamandyq aldy, keıinnen Kostenko atyndaǵy shahtada jumys istedi, artynsha pedagogıkalyq ınstıtýttyń «Dene tárbıesi» fakýltetin bitirdi. 1987 jyldan bastap onyń jattyqtyrýshylyq qyzmeti bastaldy. Aldymen «Eńbek rezervteri» qoǵamynda, sodan keıin Qaraǵandy sport uıymdarynda eńbek etti.
Jattyqtyrýshylyq ótili 40 jyldan asady. Vıktor Konstantınovıch bokstan oblystyq olımpıadalyq rezerv mektebinde balalardy jattyqtyrdy. Ol Qazaqstannyń 10-nan astam sport sheberin, sport sheberine 20 úmitkerdi tárbıeledi. Onyń shákirtteri respýblıkalyq jáne halyqaralyq jarystarda jeńiske jetti. Al eńbeginiń eń úlken jetistigi Gennadıı Golovkın bolyp sanalady.
