foto: Oqý-aǵartý mınıstrligi
Mınıstrliktiń málimdeýinshe óńirlerde 267 myń oqýshyǵa arnalǵan 232 jańa mekteptiń qurylysy júrip jatyr. Shyǵys Qazaqstan jáne Almaty oblystarynda jańa formattaǵy úsh mektep ashylǵan.
Memleket basshysynyń tapsyrmasyn oryndaý maqsatynda 23 mektepte ǵımarat qasbetterin jańartý, shatyrlar men terezelerdi aýystyrý, sý jáne elektr júıelerin jańǵyrtý, sondaı-aq mektep aýmaǵyn abattandyrý jumystary jasalyp jatyr. Jalpy, 2027 jyldyń sońyna deıin ulttyq renovasııa baǵdarlamasy aıasynda 1 231 mektep jańartylady dep josparlanǵan.
Erekshe balalardyń tolyqqandy bilim alýyn qamtamasyz etý negizinde ınklıýzıvti jáne arnaıy bilim berý salasynda da úsh jańa mekeme paıdalanýǵa berildi. Sonyń ishinde Ulytaý oblysynda aýtızm ortalyǵy iske qosylýyna oraı arnaıy mekemeler sany 496-dan 504-ke jetti. Sonymen qatar, jalpy bilim beretin mektepter janynan erekshe bilim berý qajettilikteri bar balalarǵa arnalǵan 121 qoldaý kabıneti ashyldy. Qazirgi tańda elimizdegi mektepterdiń 90 paıyzy ınklıýzıvti bilim berýge qajetti jaǵdaılarmen jabdyqtalǵan.
Soltústik Qazaqstan, Shyǵys Qazaqstan, Pavlodar oblystarynda, sondaı-aq Almaty men Shymkent qalalarynda ashylǵan alty qosymsha bilim berý nysany iri jobalar qataryna jatady.
Maýsym aıynda Aqtóbe jáne Jetisý oblystarynda eki zamanaýı balalardy saýyqtyrý ortalyǵy iske qosylady.
