IT mamannyń anımasııadaǵy bul aıtýly jańalyǵy - sala kókjıegin keńeıtýdiń tyń tásili. Jalpy mýltfılm «ınemen qudyq qazǵandaı» eńbekpen jasalatyny barshaǵa aıan. Al jasandy ıntellekt anımasııadaǵy osy aýyrdy jeńildetip, mıllıondaǵan qarjyny qaltada qaldyrýǵa oń úles qosa alady. JI-diń jetildirilgen nusqasyn kádege jaratqan Ǵasyr Quralbaıuly bastamany júzege asyrýǵa túrtki bolǵan oı men jasandy zerdeniń qazaq tilin qanshalyqty meńgergenin tarqata aıtty.
«Jasandy ıntellekt ChatGPT-diń keıingi jańartýynan soń qalyń oı qushaǵynda qaldym. Buryn ǵalymdardyń bolashaqta kınoteatrlarda tek JI arqyly jasaǵan mýltfılm, kıno kóremiz degenine tańyrqaı qaraıtynmyn. Osy ıdeıany basshylyqtyń qaperine salyp, Qazaqstan boıynsha qazaq tilinde birinshi bolyp JI arqyly mýltfılm jasap shyǵarýdy usyndym. «Turkistan» telearnasynyń basshylyǵy qoldaý bildirip, aqyly JI jazylymdaryna qarjy bóldi. Osydan keıin iske kirisip «Túrkistan saqshylaryn» jaryqqa shyǵardyq», dep atap ótken ol mýltfılmniń basty keıipkerleri retinde barys, qyran tekten-tek tańdalmaǵanyn aıtty.
«Barys pen Qyran el «Qyzyl kitabyna» engen, erekshe qasterleıtin janýar, qusymyz ekeni belgili. Týymyzda beınelengen qyrandy nasıhattaýdy da kózdedik. Aldaǵy ýaqytta shyǵarýdy josparlap otyrǵan 10 serııa Túrkistan óńiriniń ómirimen tyǵyz baılanysty keıipkerlermen tolyǵady. Menińshe, bolashaqta mıllıondaǵan aqshaǵa 6-7 aılap mýltfılm jasaıtyn dáýir bastan kóshedi. JI arqyly kez kelgen ýaqytta ár keıipkerdi ózgerte alamyz», dedi mýltfılm avtory.
Ǵasyr bul mýltfılmdi jasaýǵa bas-aıaǵy 10 kúnin arnaǵan. Anımasııanyń saýndtregin aqyn Qural Kómek jazsa, keıipkerlerdi Túrkistan teatrynyń akterleri dybystaǵan. Avtordyń aıtýynsha, JI arqyly mýltfılm jasaý otandyq kontentke de serpilis beredi. Ol úshin jasandy zerdede qazaqtyń tól áripterin jıi qoldanyp, ony meńgerýine jumyla kirisken jón.
«Mýltfılmdi jasaý barysynda bizdiń tól áripterimizdi beıneleýde JI áli birden túsine qoımaıtynyn ańǵardyq. Promtty túrlendirip nemese arnaıy dızaınmen bul kedergilerdi eńserýge tyrystyq. Keıde JI óziń qalaǵan áreket nemese mımıkany dóp bere almaı jatty. Sonda da bolashaqta promttar óńdelip, qaıta oqylyp sapaly beıneler shyǵatynyna senemin. Sondaı-aq, jobany Youtube platformaǵa apta saıyn shyǵaryp, turaqty monetızasııaǵa qosylý avtorǵa - paıda, oqyrmanǵa - sapaly kontent bolmaq», dep atap ótti ol.
«Túrkistan saqshylary» týyndysynan keıin oqýshylar arasynda JI arqyly mýltfılm jasaýǵa qyzyǵýshylyq artqanyn jelide jazylǵan pikirlerden baıqadyq. Ǵasyr osy baǵytta jumystanǵysy keletinderge ıdeıa turǵysynan tereńirek izdenip, álemdik, otandyq úzdik mýltfılmderdi kóbirek kórýge keńes berdi. Al Qazaqstandaǵy JI arqyly jasalǵan tuńǵysh mýltfılmniń avtory munymen toqtap qalmaı, balalalardyń boıynda ór rýhty oıatyp, qazaqy tálim-tárbıeni sińiretin birqatar sapaly mýltfılm shyǵarýdy josparlap otyr.
Aıta keteıik, búgin mýltfılmniń 2-serııasy «Túrkistanǵa tóngen qarajelen» ataýymen kórermenge jol tartady.
