Máýlen Áshimbaev otandyq bilim sapasyn arttyrý máselesi Memleket basshysynyń únemi basty nazarynda ekenin atap ótti. Osy rette Abaı ulttyq mektebiniń jańa ǵımaratyn salý básekege qabiletti jáne jan-jaqty damyǵan jastardy daıarlaý jolynda mańyzdy ról atqarady. Sondaı-aq atalǵan bilim ordasyn oıshyldyń murasyn zertteý men ony dáripteý baǵytyndaǵy tirek oqý ornyna aınaldyrý kózdelgen.
Mektepte sapaly professorlyq-oqytýshylyq quramǵa basymdyq berilmek. Odan bólek, oqytý úderisine joǵary bilikti mamandar men pedagogter jumyldyrylady.
«Bıyl uly Abaıdyń týǵanyna 180 jyl tolady. Prezıdent Qasym-Jomart Toqaevtyń tapsyrmasymen osy aıtýly kúnge oraı ulttyq mártebege ıe Abaı mektebin ashý josparlanyp otyr. Oıshyldyń atyna saı bilim ordasy bolý aıryqsha mańyzǵa ıe. Sondyqtan ozyq tájirıbelerge súıenip, mekteptiń sapaly pedagogıkalyq quramyn jasaqtaý qajet. Mektep Abaıdyń «Tolyq adam» fılosofııasy men Memleket basshysynyń «Adal azamat» tujyrymdamasyna taban tirep, patrıottardyń jańa býynyn qalyptastyrýǵa yqpal etedi», dep M.Áshimbaev jobany iske asyrýǵa qoldaý kórsetip kele jatqan Almaty qalasynyń ákimdigine, Oqý-aǵartý mınıstrligine, otandyq bilim berý isiniń bolashaǵyna beıjaı qaramaıtyn belsendi azamattarǵa alǵys bildirdi.
Sapar aıasynda Senat tóraǵasy men depýtattar «MOST IT Hub Almaty» ınnovasııalar ortalyǵyna baryp, onyń qyzmetimen tanysty. Bul alańda kreatıvti, tehnologııalyq jáne kásipkerlik baǵyttaǵy jobalardy biriktirý arqyly ulttyq ekonomıkany damytýǵa arnalǵan irgeli ister júzege asyrylady.
