Kezdesý barysynda Máýlen Áshimbaev meımandy EKPA-nyń Qazaqstan boıynsha baıandamashysy bolyp taǵaıyndalýymen quttyqtaı kelip, Qazaqstan Parlamenti men atalǵan Assambleıa arasynda 20 jyl ishinde tyǵyz jáne tıimdi ózara qarym-qatynas ornaǵanyn atap ótti. Sondaı-aq is-shara kezinde qazirgi tańda Qazaqstan depýtattary EKPA-nyń plenarlyq otyrystaryna jáne onyń komıtetteriniń jumysyna belsendi qatysyp kele jatqany aıtyldy.
Suhbattasýshylar birlesken jumystyń mańyzdy baǵyttarymen qatar, Ádiletti Qazaqstan qalyptastyrý jolyndaǵy turaqty damý tetikterin de talqylady. Senat tóraǵasy saıası júıeni demokratııalandyrý baǵytynda atqarylyp jatqan jumystarǵa jáne adam quqyqtaryn qorǵaý, genderlik teńdik júıesin nyǵaıtý, bılik tarmaqtary, sondaı-aq ortalyq pen óńirler arasyndaǵy ókilettikter men jaýapkershiliktiń teńgerimin qamtamasyz etýge qolǵa alynǵan sharalarǵa da jan-jaqty toqtalyp ótti.
«El Prezıdenti Qasym-Jomart Toqaevtyń bastamasymen elimizde aýqymdy jáne keshendi reformalar iske asyrylyp jatyr. Memleket basshysy Ádiletti Qazaqstan qalyptastyrý tujyrymdamasyn usyndy. Bul jumys zań ústemdigin kúsheıtýdi, bılik tarmaqtary arasynda ókilettikterdiń teńgerimdi bólinýin qamtamasyz etýdi, sondaı-aq ortalyq jáne óńirlik bılik organdary arasyndaǵy úılesimdilikti arttyrýdy kózdeıdi. Qazirgi tańda Prezıdent bastamashylyq etken saıası jáne ekonomıkalyq reformalardy zańnamalyq turǵydan qamtamasyz etý Parlament qyzmetiniń negizgi basymdyǵy bolyp sanalady», dedi palata spıkeri.
Sonymen qatar kezdesýde rýhanı dıplomatııany dáripteý máselelerine de basa mán berildi. Bul rette bıyl qyrkúıekte ótetin Álemdik jáne dástúrli dinder kóshbasshylarynyń VIII sezine daıyndyq barysy sóz boldy.
О́z kezeginde Jolt Nemet elimizdegi saıası jáne áleýmettik-ekonomıkalyq ózgeristerge joǵary baǵa berdi. Sondaı-aq ol Qazaqstannyń EKPA-men seriktestigi odan ári nyǵaıa túsetinine senim bildirdi.
Budan basqa, taraptar Qazaqstan men Majarstan arasyndaǵy yntymaqtastyqqa, onyń ishinde parlamentaralyq baılanysqa qatysty máselelerge nazar aýdardy. Kezdesýde eki eldiń halyqtaryn tereń tarıhı tamyr baılanystyratyny, joǵary deńgeıdegi búgingi ózara tıimdi yntymaqtastyq memleketterdiń qarym-qatynasyn odan ári damytýǵa jańa múmkindikter beretini aıtyldy.
