Sapar barysynda S.Toraıǵyrov ýnıversıtetinde jas saılaýshylarmen, máslıhat depýtattarymen, jastar uıymdarynyń ókilderimen, sondaı-aq Sharbaqty aýdanynyń halqymen jáne ákimimen kezdesýler ótti. Is-sharalarǵa 500-den asa adam qatysty.
Nurlan Ábdirov Prezıdent Qasym-Jomart Toqaev bastamashylyq etken konstıtýsııalyq reforma sheńberinde saılaý júıesin transformasııalaý týraly aıta kele, jańashyldyqtar qoǵamnyń suranysyna negizdelgenin atap ótti. Sonymen qatar ol elimizdiń saılaý organdarynyń damýy, saılaý komıssııalaryn kásibılendirý, elektoraldyq oqytý, halyqaralyq yntymaqtastyq jáne baıqaý ınstıtýtyn arttyrý jóninde sóz qozǵady.
«Eldiń saılaý júıesin transformasııalaý halyqtyń eldi basqarýǵa qatysýyn arttyrý jolymen bılik ınstıtýttaryn qalyptastyrýdyń sapaly jańa modeline kóshýdi bildiredi. Saılaý júıesiniń jańashyldyqtary jurtshylyqtyń suranystary men usynystaryna negizdelgen», dedi N.Ábdirov.
Saılaý úderisine qatysýshylarmen tikeleı dıalogti damytýǵa erekshe nazar aýdaryldy. 2022 jyldan bastap OSK tóraǵasy el kóleminde 143 kezdesý ótkizdi, oǵan 18 myńnan asa adam qatysty.
Pavlodar oblysyna sapardyń birinshi kúninde ınteraktıvti sessııaǵa qatysýshylar saılaý júıesin damytý, saılaýdy sıfrlandyrý jáne álemdik trendter týraly suraqtar qoıyp, belsendilik tanytty. Máselen, 2-kýrs stýdenti, Jas saılaýshylar klýbynyń múshesi Aısha Talasova pikir almasýǵa bolatyn saılaý jańalyqtaryn jınaý úshin jastar portalyn qurýdy usyndy. Taǵy bir stýdent Ashat Esimov elektoraldy saladaǵy álemdik trendterge qyzyǵýshylyq bildirse, al Aıtýar Savrıdenov saılaý úderisin sıfrlandyrý múmkindikteri týraly surady.
300-den asa jas respondent S.Toraıǵyrov ýnıversıtetinde jáne Sharbaqty aýdanyndaǵy kezdesýlerde ózekti saılaý máseleleri boıynsha onlaın-saýalnamaǵa qatysty. Nátıjelerge kelsek, respondentterdiń 72,7%-y prezıdenttikke kandıdattar úshin memlekettik qyzmet ótiline qoıylatyn talaptardy qoldaıdy; 40,4%-y qaǵaz bıýlletenmen daýys berýdi qalaıdy; 36,3%-y sot is-áreketke qabiletsiz dep tanyǵan azamattar daýys bermeýi kerek dep sanaıdy; 41,3%-y qylmys jasaǵany úshin sottalǵan adamdardyń daýys berý quqyǵy bolmaýǵa tıis dep sanaıdy; 51,6%-y saılaýlar men referendýmdar týraly aqparatty áleýmettik jeliler arqyly biledi. OSK basshysy bul saýalnamalardyń praktıkalyq máni baryn jáne olardyń nátıjeleri aldaǵy saılaý naýqandary kezinde saılaýshylardy aqparattandyrý strategııasyn qarastyrǵanda eskeriletinin atap ótti.
Sapar aıasynda óńirdiń aýmaqtyq saılaý komıssııalary múshelerimen keńes ótti. Saılaýdyń zańdylyǵy men ashyqtyǵyn qamtamasyz etý, saılaý ýchaskelerin materıaldyq-tehnıkalyq jabdyǵyn jaqsartý jáne komıssııa músheleriniń biliktiligin arttyrý máseleleri talqylandy. Sondaı-aq aýyl ákimderin saılaý máseleleri boıynsha praktıkalyq jaǵdaılardy taldaý jáne komıssııa músheleriniń saılaý zańnamasyn bilýine testileýdi qamtıtyn semınar-trenıng ótti.
Sapardyń ekinshi kúni Nurlan Ábdirov Sharbaqty aýdanynda boldy. Ol aýyl jastary, kolledj stýdentteri jáne turǵyndarymen kezdesti. Onda saılaýdyń olardyń ómirine qalaı áser etetini talqylandy.
Aýyldyq kitaphana qyzmetkeri Natalıa Mashenko ákimderdi tikeleı saılaý bılikti halyqqa jaqyndata túskenin atap ótti. Aýdandyq qoǵamdyq keńesten Baqtyly Qalybaeva aýdan ákiminiń turaqty túrde aýyldyq okrýgterdi aralap, turǵyndarmen kezdesip turatynyn aıtty. Aýdandyq máslıhat depýtaty Vladımır Polıakov ákimderdi saılaý quqyǵynyń halyqqa berilýimen bılikke degen senimniń nyǵaıa túskenin málimdedi.
OSK tóraǵasy Qazaqstanda 2021 jyldan bastap aýyl ákimderiniń tikeleı saılaýy ótkizilip kele jatqanyn, búginde olardyń 97 paıyzǵa jýyǵyn halyq tikeleı saılaǵanyn eske saldy. 2023 jyly pılottyq rejimde 45 aýdan jáne qala ákimderiniń saılaýy ótti. Onyń aıtýynsha, bul ákimderdiń halyq aldyndaǵy jaýapkershiligin arttyryp, halyqtyń múddesi men suranysyna anaǵurlym jaqynyraq etedi. «Bul ózgeristerdiń barlyǵy – Prezıdent Qasym-Jomart Toqaev usynǵan reformalardyń bir bóligi. Munyń maqsaty – azamattardyń jergilikti deńgeıde sheshimder qabyldaýǵa qatysýyn keńeıtý», dedi ol.
Sapar barysynda eń belsendi qatysýshylarǵa OSK bastamasymen shyǵarylǵan elektoraldy taqyrypqa arnalǵan kitaptar tapsyryldy.
