Foto: Aqorda
Memleket basshysy Qasym-Jomart Toqaev Uly Jeńis kúnine oraı qazaqstandyqtardy quttyqtap, ataýly merekeniń mańyzyn atap ótti. Prezıdenttiń aıtýynsha, bıyl Uly Jeńiske 80 jyl tolyp otyr. Bul — halqymyzdyń otansúıgishtigi men jaýyngerlik rýhynyń aıqyn kórinisi.
«Bıyl Uly Jeńiske – 80 jyl! Barshańyzǵa Uly Jeńis kúni qutty bolsyn! Bul meıram – halqymyzdyń jaýyngerlik rýhynyń sımvoly. Biz eldik úshin kúresken batyr babalardy ulyqtaımyz. Otan qorǵaý jolynda opat bolǵan bozdaqtarǵa taǵzym etemiz. Beıbit kúndi qyraǵy kúzetip turǵan sarbazdarǵa qurmet kórsetemiz», dedi Memleket basshysy.
Prezıdent soǵys zardaby Qazaqstan halqy úshin de aýyr bolǵanyn eske saldy.
«Qaharly kúnder soǵystyń tek qasiret ákeletinin kórsetti. Beıbitshiliktiń baǵa jetpes baılyq ekenin uǵyndyrdy. Uly Jeńis – tarıhymyzdyń ajyramas bóligi jáne kúlli álem úshin úlken sabaq. Biz osy aqıqatty árdaıym este saqtaýymyz kerek. Zulmat kezeńdi bastan ótkergen maıdangerler qazir ortamyzda otyr. Qurmetti ardagerler, barsha halyqtyń atynan Sizderge shyn júrekten alǵys aıtamyn! Aǵa býynnyń óshpes erligi – urpaqqa ulaǵat. Otanshyldyǵy men janqııarlyǵy – úlgi-ónege. Biz Uly Otan soǵysynyń ardagerlerin eshqashan umytpaımyz! Barshańyzǵa bas ıemiz!» dedi Qasym-Jomart Toqaev.
