Foto: Ashyq derekkóz
Prezıdenttiń aıtýynsha, soǵys jyldarynda Qazaqstannan maıdanǵa 1 mıllıon 200 myńnan astam adam attanǵan. Olardyń jartysy urys dalasynda erlikpen qaza tapty.
«Keler urpaqtyń jarqyn ári beıbit keleshegi úshin óz ómirlerin qurbandyqqa shaldy. Dańqty ul-qyzdarymyz erliktiń ozyq úlgisin kórsetti. Qazaqtyń jaýjúrek ult ekenin pash etti», dedi Memleket basshysy.
Uly Otan soǵysynda 500-den astam qazaqstandyq Keńes Odaǵynyń Batyry atandy. Olardyń qatarynda Talǵat Bıgeldınov, Baýyrjan Momyshuly, Mánshúk Mámetova, Álııa Moldaǵulova, Raqymjan Qoshqarbaev, Hıýaz Dospanova sekildi esimderi el jadynda máńgi qalǵan erler men erjúrek arýlar bar.
Sonymen qatar, tyl eńbekkerleriniń jankeshti eńbegi de erekshe atalyp ótti. Soǵys jyldary Qazaqstannan maıdanǵa bir jarym myń vagon kıim-keshek pen azyq-túlik jóneltilip, júzdegen zaýyt pen fabrıka kóshirilip, maıdanǵa qajetti ónim shyǵaratyn óndiris oryndary qysqa merzimde iske qosyldy.
«Jurtymyz judyryqtaı jumylyp, kúni-túni jumys istep, qarý-jaraq pen oq-dári daıyndady, áskerı kıim tikti. Soǵystaǵy on oqtyń toǵyzy Qazaqstanda jasaldy. Uly Jeńisti ulyqtaý degenimiz, bul – eń aldymen, erjúrek batyrlarymyzdy jadymyzda máńgi saqtaý degen sóz. Olardyń erligi men eńbegin jas urpaq bilip ósýge tıis», dedi Memleket basshysy.
