Foto: Aqorda
Kórermender álemdegi eń keń taralǵan kóp maqsatty tikushaqtardyń biri – Mı-17-ni tamashalady. Bul tehnıka qurlyq áskerleriniń mobıldiligin arttyrýǵa, jeke quram men qarý-jaraqty jetkizýge, sondaı-aq qıyn jaǵdaılarda – taýly aımaqtar men joǵary temperatýrada áskerı tapsyrmalardy oryndaýǵa qoldanylady.
Sondaı-aq Mı-35M soǵys tikushaqtary da paradqa qatysty. Olar qurlyq áskerlerine urys alańynda qoldaý kórsetýge arnalǵan jáne qarsylas tehnıkalary men tiri kúshin joıýda qoldanylady.
Mı-8 jáne Mı-171 armııalyq tikushaqtary da kórsetildi. Olar desant túsirý, oq-dári men júk tasymaldaý, jaralylardy evakýasııalaý jáne qarsylas oshaqtaryn joıýǵa arnalǵan.
Tótenshe jaǵdaılar mınıstrligi atynan ES-145 jáne N-145 tikushaqtary qatysty. Bul áýe tehnıkalary apat saldaryn joıý, izdestirý-qutqarý operasııalary, órt sóndirý jáne medısınalyq evakýasııa kezinde qoldanylady.
Áskerı-kóliktik avıasııa S-295 ushaǵyn kórsetti. Ol 9 tonnaǵa deıin júk nemese 70 áskerı qyzmetkerdi tasymaldaı alady jáne 5000 shaqyrymǵa deıin ushýǵa qabiletti. Ushaq zamanaýı navıgasııalyq jáne dıagnostıka júıelerimen jabdyqtalǵan.
L-410 jeńil kóp maqsatty ushaǵy da kórsetildi. Ol daıyndalmaǵan áýejaılarda jumys isteı alady jáne 19 jolaýshy nemese 1800 kg júk tasymaldaı alady.
Kýrsanttardy kez kelgen aýa raıynda daıyndaýǵa arnalǵan L-39 oqý-jaýyngerlik ushaǵy da paradqa qatysty. Bul ushaq ushý, barlaý jáne nysanalarǵa soqqy jasaý daǵdylaryn úıretýge kómektesedi.
Sondaı-aq paradta Qorǵanys mınıstrliginiń áýedegi komandalyq pýnkti – Tý-154 ushaǵy kórsetildi. Ol 180 áskerı qyzmetkerdi 5000 shaqyrymǵa deıin tasymaldaı alady jáne júk ushaǵy retinde de qoldanylady.
Kópshiliktiń nazaryn alǵash ret paradqa qatysqan A-400M ushaǵy aýdardy. Bul tórt qozǵaltqyshty zamanaýı týrbovıntti kólik ushaǵy 2024 jyldyń sońynda Áýe qorǵanys kúshteriniń qarýyna engen. Ol áskerı tasymaldan bastap gýmanıtarlyq mıssııalar men medısınalyq evakýasııaǵa deıingi túrli tapsyrmalardy oryndaı alady.
Sý-30SM joıǵyshtary aspandy Qazaqstannyń Memlekettik týynyń túsine boıalǵan tútin jolaqtarymen kómkerip, áserli kórinis jasady. Bul aýyr fronttyq joıǵysh kez kelgen aýa raıynda, kúndiz-túni jaý nysandaryn dál joıýǵa qabiletti.
Paradty «ushatyn tank» atanǵan Sý-25 shabýyldaýshy ushaqtarynyń ushýy qorytyndylady. Olar áskerge áýeden qoldaý kórsetip, kez kelgen jaǵdaıda – tikeleı kórinetin nysandardy joıý qabiletimen erekshelenedi.
Jalpy paradqa 66 birlik avıasııalyq tehnıka qatysty.
