Birikken Ulttar Uıymy Bas Assambleıasynyń qararyna sáıkes, 2026 jyl – Halyqaralyq eriktiler jyly dep jarııalandy. Osyǵan oraı elimizde aýqymdy daıyndyq jumystary júrgizilip jatyr. Atalǵan bastama Prezıdent Qasym-Jomart Toqaevtyń usynysy negizinde júzege asyrylyp jatqanyn aıta ketý kerek. Memleket basshysy bul usynysty 2020 jyly BUU Bas Assambleıasynyń 75-sessııasyndaǵy jalpy saıası pikirtalas barysynda resmı túrde jarııalaǵan bolatyn.
Prezıdent Q.Toqaev elimizde volonterlik qyzmetti damytýǵa aıryqsha mán berip keledi. Ol eriktilikti Ádiletti Qazaqstandy qurý jolyndaǵy mańyzdy qoǵamdyq bastamalardyń biri retinde qarastyrady.
Osy bastamany ilgeriletý maqsatynda keshe Astanada Halyqaralyq eriktiler jylyn ótkizýge daıyndyq máselelerine arnalǵan Ulttyq uıymdastyrý komıtetiniń alǵashqy otyrysy ótti. Oǵan Mádenıet jáne aqparat mınıstri Aıda Balaeva, BUU Eriktiler baǵdarlamasynyń atqarýshy úılestirýshisi Toıly Qurbanov, memlekettik organdardyń, úkimettik emes uıymdardyń jáne volonterlik birlestikterdiń ókilderi qatysty.
Jıyn barysynda mınıstr A.Balaeva elimizdegi volonterlik salasynda atqarylyp jatqan jumystar men otandastarymyzdyń jetistikteri jóninde baıandady.
– Otandastarymyz álemniń túkpir-túkpirinde eriktilik jobalarǵa, sonyń ishinde BUU, IýNISEF sııaqty halyqaralyq uıymdardyń bastamalaryna belsendi atsalysyp keledi. Úkimettiń qoldaýymen 2020–2023 jyldar aralyǵynda toǵyz otandasymyz BUU-nyń túrli qurylymdarynda volonter retinde qyzmet atqardy. О́tken jyly jeti volonterimiz BUU-nyń Kenııa, Taıland jáne Túrkııadaǵy agenttikterine jiberildi, – dedi A.Balaeva.
Ulttyq uıymdastyrý komıtetiniń músheleri men qatysýshylar elimizde jáne tutastaı alǵanda Ortalyq Azııada volonterler qozǵalysyn damytýǵa, azamattyq belsendilikti nyǵaıtýǵa baǵyttalǵan mańyzdy bastamalar men aldaǵy is-sharalardy talqylady. Spıkerler sondaı-aq Eriktiler jylyna daıyndyq barysy týraly baıandap, jańa jobalar jóninde oı bólisti.
BUU Eriktiler baǵdarlamasynyń atqarýshy úılestirýshisi T.Qurbanov Qazaqstan tarapyna halyqaralyq eriktiler jylyn uıymdastyrýǵa belsendi kiriskeni úshin rızashylyǵyn bildirip, elimizdiń bul bastamadaǵy kóshbasshylyǵyn erekshe atap ótti.
– Sizderdiń belsendi qyzmetterińiz eldegi volonterlik mádenıetiniń damýyna tyń serpin berip qana qoımaı, Qazaqstandy azamattyq bastamalar salasyndaǵy mańyzdy halyqaralyq seriktes retinde tanyta bildi. Búginde Qazaqstan – BUU eriktiler baǵdarlamasyna qatysýshy el retinde óz pozısııasyn nyqtap, keleshekte basqa memlekettermen jumys barysynda biz Qazaq eliniń oń tájirıbesin úlgi retinde keltiretin bolamyz, – dedi T.Qurbanov.
Otyrysta taǵy bir mańyzdy jańalyq – Almaty qalasynda BUU Eriktiler qozǵalysynyń Ortalyq Azııadaǵy sýbóńirlik keńsesi ashylatyny jarııa etildi.
– Bizdiń ortaq mindetimiz – memlekettik qurylymdar, qoǵamdyq uıymdar, bilim berý mekemeleri men buqaralyq aqparat quraldary birlesip, volonterlikke qoldaý kórsetýdiń ornyqty júıesin qalyptastyrý. Bul baǵyttaǵy jumys barlyq taraptyń úılesimdi yntymaqtastyǵyna negizdelýge tıis, – dep qorytyndylady A.Balaeva.
