Elimizde trenıngter, sheberlik synyptary men semınarlardyń sapasyna kóńili tolmaıtyn azamattar sany ulǵaıyp keledi. Jurt taýdaı ýádege senip, túımedeı nátıjemen qalady. Oqýǵa úlken qarajat salý úshin keıde nesıe alady. Biraq mardymdy sabaq ta ala almaı, jumsalǵan aqshany da qaıtara almaı san soǵyp jatqany. Turǵyndar negizinen onlaın jáne oflaın kýrstardyń sapasyna, daıyndyqtyń tómendigine, oqý aqysyn qaıtarýdan bas tartý, oqytýshylarda lısenzııanyń bolmaýy sııaqty keleńsizdikterge narazy. Shaǵymdar bilim berý salasyndaǵy ýákiletti organdarǵa jiberilgen. Qazirgi kúni Tutynýshylar odaǵyna túsken árbir besinshi ótinish bilim berý qyzmetterine qatysty bolyp otyr. Adamdar kóbine osyndaı mekemelerdiń ýádesi isine saı kelmeıtin jaǵdaıǵa tap bolady. Negizinen trenıngter men semınarlar ótpes buryn aldyn ala kelisimshart jasalmaıdy, al tólem aýdarym arqyly júzege asyrylady, bul quqyqtardy qorǵaýdy qıyndatady.
«Mundaı bilim berýde naqty standarttar joq, jattyqtyrýshynyń nemese oqytýshynyń biliktiligin rastaıtyn, ózin-ózi retteıtin uıym joq. Jaı ǵana yntalandyrý semınarlaryna adamdar qyrýar aqsha tóleıdi», deıdi Eýrazııalyq tutynýshylar odaǵynyń basqarma tóraǵasy Svetlana Romanovskaıa.
Osyǵan baılanysty mamandar árdaıym kelisimshart jasasýǵa, oqý aqysyn resmı túrde, rastaý arqyly tóleýge, sondaı-aq trenıngke qatysqanyn dáleldeıtin prosesti tirkeýge keńes beredi. Eger quqyqtar buzylsa, aldymen satýshyǵa sotqa deıingi shaǵym jiberý, sodan keıin tutynýshylardyń quqyqtaryn qorǵaý jónindegi qoǵamdyq birlestikterge habarlaý, daý rettelmegen jaǵdaıda sotqa júginý qajet.
