Kóktem kele sala elorda kósheleriniń ár buryshynan aýyr tehnıka men jumysshylar kórine bastaıdy. Ásirese Turan, Máńgilik El, Qabanbaı batyr, Beıbitshilik syndy negizgi magıstraldar jıi jóndeledi. Bir qyzyǵy, buǵan deıin ǵana jańartylǵan keıbir joldar kelesi jyly taǵy qazylyp jatady. Turǵyndar arasynda: «Bul joldyń sapasy nashar ma, álde josparlaý durys júrgizilmeı me?» degen suraq jıi týyndaıdy.
Mamandardyń aıtýynsha, jol jóndeýdiń jıi qaıtalanýyna sapasyz qurylys materıaldary, qystaǵy qatty aıazdan asfalttyń buzylýy, jol asty ınjenerlik jelilerin (sý, jylý, elektr) jıi aýystyrý qajettiligi, merdiger kompanııalardyń jaýapsyzdyǵy men baqylaýdyń álsizdigi sebep bolýy múmkin.
Jol jóndeýge qyrýar qarjy bólinse de, keıbir kóshelerdiń tozýy bir-eki jyl ishinde-aq baıqalyp jatady. Bul rette memlekettik baqylaý men tehnıkalyq qadaǵalaý jumystarynyń sapasyn kóterý qajettiligi aıtylyp júr.
Jóndeý jumystary kóbine kúndizgi ýaqytta júrip, jol qozǵalysyna aıtarlyqtaı kedergi keltiredi. Keıde bir ǵana jolaq ashyq qalyp, saǵattap sozylatyn keptelisterge sebep bolady. Júrgizýshilerdiń aıtýynsha, tańerteńgi jáne keshki ýaqytta jumysyna ne úıine jetý úshin burynǵydan eki ese kóp ýaqyt ketedi.
Qala ákimdigi jol jóndeý jumystarynyń maýsymdyq ekenin aıtyp, keshirim suraýmen shekteledi. Degenmen, másele jyl saıyn qaıtalanyp jatqany – júıeli kemshiliktiń baryn kórsetedi.
Astana sııaqty qarqyndy damyp jatqan qalada jol jóndeý – mindetti prosess. Alaıda bul prosess turǵyndardyń ómir sapasyna keri áser etpeýi tıis. Árbir jóndelgen jol kem degende 5-7 jyl paıdalanýǵa jaramdy bolýy qajet. Áıtpese, jyl saıyn qaıtalanatyn qurylys – elorda mártebesine kóleńke túsiredi.
