Memleket basshysynyń quttyqtaýynda halyq Qýanysh Sultanovty kórnekti memleket jáne qoǵam qaıratkeri, bilikti dıplomat, isker azamat retinde qurmetteıtini atap ótilgen.
«Uzaq jylǵy eńbek jolyńyzda saıası-ákimshilik qyzmetterdi abyroıly atqaryp, Qazaqstannyń memlekettiligi berik qalyptasýyna jáne álemdik qoǵamdastyqta mártebesi nyǵaıa túsýine súbeli úles qostyńyz. Parlament depýtaty bolǵan tusyńyzda otandyq zańnamany jetildirýge kúsh-qaıratyńyzdy arnadyńyz. Qashanda eldik múddeni joǵary qoıyp, óskeleń urpaqqa Otan men qoǵamǵa adal qyzmet etýdiń úlgisin kórsete bildińiz. Sizdiń sabyrly da salmaqty minezińiz ben azamattyq ustanymyńyz zamandastaryńyz arasynda qadir-qasıetińizdi arttyra túsetini anyq», delingen Prezıdenttiń quttyqtaýynda.
Senat spıkeri Qýanysh Sultanovtyń Memleket basshysynyń Jarlyǵymen memlekettik jáne qoǵamdyq qyzmettegi aıryqsha eńbegi úshin «Otan» ordenimen marapattalǵanyna nazar aýdaryp, bul qurmettiń mańyzdy ekenin aıtty.
M.Áshimbaev atap ótkendeı, Qýanysh Sultanulynyń eńbek joly egemen elimizdiń tarıhymen tikeleı jáne tyǵyz baılanysty. Táýelsizdiktiń alǵashqy jyldarynda qabyldanǵan árbir sheshim memlekettiń damýyna, sonyń ishinde mańyzdy ınstıtýttyń biri – parlamentarızmniń qalyptasýyna erekshe yqpal etkeni anyq.
«Qýanysh Sultanuly ónegeli ómir jolynda joǵary laýazymdy qyzmetterdi abyroımen atqardy. Sonymen qatar mereıtoı ıesi ulttyq parlamentarızmdi qalyptastyrýǵa, otandyq zań shyǵarý qyzmetin jetildirýge zor eńbek sińirdi. 20 jylǵa jýyq ýaqyt qos Palatanyń depýtaty bolyp, osy baǵyttaǵy irgeli isterdiń bel ortasynda júrdi. Sol kezde áriptesterimen birge eldik múddeni kózdeıtin mańyzdy zańdar qabyldap, elimizdi damytýdyń quqyqtyq negizin qalady. Búginde kópshilik Qýanysh aǵamyzdy jón siltep, jol kórsetken ustaz retinde de qurmet tutady. Men de Qýanysh Sultanulyn ózim kóp tálim alǵan ustazym dep esepteımin», degen M.Áshimbaev mereıtoı ıesin quttyqtap, zor densaýlyq jáne qut-bereke tiledi.
Sondaı-aq is-shara barysynda Q.Sultanovty Senatorlar keńesiniń músheleri, áriptesteri, zamandastary, belgili qaıratker tulǵalar jáne zııaly qaýym ókilderi quttyqtap, izgi lebizderin jetkizdi.
