Qazaqstan Respýblıkasy Ǵylym jáne joǵary bilim mınıstrligi men Garvard ýnıversıtetiniń quramyndaǵy Devıs atyndaǵy Reseı jáne Eýrazııalyq zertteýler ortalyǵy ózara túsinistik týraly memorandýmǵa qol qoıdy.
Qujat aıasynda taraptar akademııalyq jáne ǵylymı baǵyttarda birlesken bastamalardy iske asyrýǵa ýaǵdalasty. Atap aıtqanda, tarıh, saıasat, ekonomıka, turaqty damý jáne basqa da salalar boıynsha akademııalyq almasýlar, sonyń ishinde stıpendııalar men ǵylymı taǵylymdamalar uıymdastyrý qarastyrylǵan. Ǵalymdarǵa birlesken jobalar sheńberinde Garvard ýnıversıtetiniń kitaphana jáne arhıv qorlary ýaqytsha qoljetimdi bolady.
Taraptar Qazaqstannyń tarıhı murasyn saqtaý jáne ilgeriletý máselesine aıryqsha nazar aýdardy. Osyǵan baılanysty Garvard ýnıversıtetiniń Hoýton kitaphanasymen birlesip, Qazaqstannyń sırek kitaptary men qoljazbalarynan turatyn jınaqty sıfrlandyrý jáne katalogtaý jobasyn iske qosý týraly kelisimge qol jetkizildi. Joba aıasynda zertteýshiler men stýdentter úshin qoljetimdi bolatyn elektrondyq derekqor ázirlenip, Qazaqstan men AQSh kitaphanalary men arhıvteriniń mamandary arasynda sırek basylymdardy saqtaý, júıeleý jáne zertteý boıynsha tájirıbe almasý kózdelip otyr.
Sondaı-aq qazaqstandyq jınaqtarǵa arnalǵan kórmeler men mádenı is-sharalar ótkizý josparlanǵan. Bul elimizdiń baı mádenı jáne tarıhı murasyna jahandyq nazar aýdartýǵa múmkindik beredi. Sonymen qatar sırek kitaptar kolleksııasy negizinde qazaqstandyq ýnıversıtetterdiń stýdentteri men zertteýshilerine arnalǵan oqý kýrstaryn ázirleý múmkindigi qarastyrylady.
Yntymaqtastyqtyń mańyzdy baǵyty retinde qazaqstandyq bilim jáne ǵylymı mekemelerge Hoýton kitaphanasynyń elektrondyq derekqoryna qoljetimdilik berý qarastyrylyp otyr. Bul ǵylymı-zertteý jumystary men bilim berý úderisiniń múmkindikterin edáýir keńeıtedi. Memorandým aıasynda qazaqstandyq jınaqtar materıaldary negizinde ǵylymı jobalar men jarııalanymdardy qoldaý da kózdelgen. Bul Qazaqstannyń tarıhy men mádenıetin tereńirek zerdeleýge jol ashady.
Jasalǵan kelisim ekijaqty áriptestiktiń jańa kókjıekterin ashyp, akademııalyq tájirıbe almasýǵa múmkindik beredi jáne Qazaqstanda ǵylym men joǵary bilimdi damytýǵa eleýli úles qosady.
