«SILENSE» bı teatrynyń negizi 2004 jyly qalanǵan. Shırek ǵasyrǵa jýyq ýaqytta quram jańaryp, túrlenip otyrǵanmen shyǵarmashylyq jol toqyraǵan joq. Búginde bul ujymda 6 «erekshe qyz» ter tógedi. Olardyń talantyn tanyp, jigerin janı túsý úshin bı-teatry 2023 jyly jańa formatta jandandy. Sol tustan talapty qyzdardy «Mádenıet salasynyń úzdigi», horeograf Turlybekova Botagóz baptaýda. Turlybekova Botagóz - ómirin bıge baılap, Shymkenttegi M.Áýezov ýnıversıtetiniń «Horeografııa» mamandyǵyn támamdaǵan. 20 jyldan beri jas býynnyń ónerin órletýge den qoıǵan. Búginde arnaıy bı stýdııasyn ashyp, «erekshe» qyzdardy da bıge baýlyp júr.
«Bul bı teatrynda tek qulaǵy nashar estıtin jandar bıleıdi. Alǵashynda, bul topqa konkýrstar úshin ǵana bı qoıyp júrdim. Sol baıqaýlardan ylǵı da júldeli oryndarmen oraldy. Qyzdarmen jaqyn tanysa kele ishki jan-dúnıesin túsinip, bıge degen qushtarlyqtarynyń bıik ekenin baıqadym. Jetekshilik etý mindetin moınyma alyp, top aldyna mańyzdy mejelerdi bekitip, etene iske kirisip kettik», degen Botagóz Serikqyzynyń ár isinen mamandyǵyna degen mahabbat seziledi. Ol erekshe qyzdarmen túsinisý úshin maqsatty túrde ym-ıshara tilin de meńgergen.
«Bul balalarǵa oıyńdy jetkizý qıyndaý ekeni málim. Ádette bı úıretkende obraz arqyly, tilmen sýrettep jetkizemiz. Olarǵa ony aıta almaıtyn bolǵandyqtan ym-ıshara tilin qoldaný kerek. Balalardyń janyn tereń túsiný úshin osy tildi arnaıy kýrsqa baryp úırenip, meńgerip shyqtym. Asylynda, bıdi qımyl men ıshara quraıdy. Sondyqtan asa kedergi joq. Keıde meniń qatelesken tusymdy qyzdar tolyqtyryp, tilsiz-aq túsinisip kelemiz», deıdi horeograf maman.
Qyzdar Botagóz Serikqyzynyń kómegimen aptasyna úsh ret sheberligin shyńdaıdy. Talmaı eńbek ete júrip qorjyndaryn 9 bı qoıylymmen tolyqtyrǵan. Onyń tórteýi ym-ısharaǵa negizdelgen.
Qyzdardyń ózara uıymshyldyǵy men bir-birin qoldaýy da árdaıym jeńis tuǵyrynan tabylýǵa septesip júr. Bekem birliginiń arqasynda bı ujymy Oral qalasynda ótken «Sizdi bıge shaqyramyz» atty respýblıkalyq bı baıqaý-festıvalinde Ulttyq bı atalymy boıynsha Gran prı, zamanaýı bı atalymy boıynsha 3-oryndy baǵyndyrǵan. Sondaı-aq, Astanada uıymdastyrylǵan «MEGA-STAR» shyǵarmashylyq baıqaýynda «Bas júldeni» jeńip alyp, Germanııa, Egıpet sahnalarynda óner kórsetýge joldama alǵan. Shekteýli múmkindik shekarasyn kesip ótken «SILENSE» bı teatry saý balalar arasynda da top jaryp júr.
Botagóz Serikqyzynyń aıtýynsha, erekshe jandardy bıge baýlý halyqaralyq deńgeıde «bı-qımyl terapııasy» dep atalady. Ataýy astarlap turǵandaı munda bı arqyly jandy emdeý - negizgi nysana. «SILENSE» bı teatrynyń múshesi Arýjan Asqarova ustazdary bul mindetti únsiz uǵynyp júrgenin jetkizdi.
«Ustazymyz óte meıirimdi adam. Bizdi qıyndyqta qaldyrǵan emes. Árdaıym shabyttandyryp, alǵa umtyldyrady. Osyndaı qarym-qatynasyna qarymta retinde qyzdar da qarap qalmaı baryn salady», dedi ol.
Bı teatrynyń ujymy 2024 jyly alǵashqy esep berý keshinde kópshilik tarapynan joǵary qoldaý-qoshemetke ıe bolǵan. Endi shyǵarmashylyq top shyńdala túsip, kórermen senimine selkeý túsirmeýdi maqsat etip otyr.
