Foto: ashyq derekkóz
«Qyzylorda oblysy boıynsha 60 myń gektar aýmaq zertteldi. Onyń 18 myń gektaryn hımııalyq óńdeý qajet. Qazirgi tańda 11 700 gektar jer óńdeldi. Bul jumystyń barynsha tez aıaqtalýyn jáne sapaly oryndalýyn jeke baqylaýymda ustaımyn», dedi mınıstr.
Oblysta josparlanǵan 19,654 myń gektardyń 11,706 myń gektary óńdelgen. Zııankesterge qarsy kúreske 4 jeńil ushaq, 2 asa jeńil ushaq, 12 jerústi agregat, 5 dron jáne 45 arqaǵa asylatyn búrikkish qural qoldanylyp jatyr. О́ńdeýge jatatyn boljamdy jalpy aýmaq 60,024 myń gektar bolyp otyr. Josparlanǵan alańdar boıynsha jetkizýshi uıymdarmen kelisim-shart jasalǵan.
Úılestirý jumystaryn júrgizý úshin oblys ákiminiń orynbasary basqaratyn jedel shtab quryldy. Mundaı shtabtar barlyq aýdanda jumys isteıdi. Jergilikti jerlerde monıtorıng pen baqylaýǵa 279 maman tartylǵan. Búgingi kúnge deıin 474,1 myń gektar jer zerttelip, úıirli shegirtkeniń dernásilderi anyqtaldy. Degenmen, aýyl sharýashylyǵy daqyldaryna zııan kelgeni tirkelgen joq.
Aýdannan keıin mınıstr oblys ortalyǵynda ótken respýblıkalyq shtab otyrysyna qatysty.
