Mınıstr medıa keńistikte, ásirese áleýmettik jelilerdegi aqparattyq qaýipsizdikti qamtamasyz etýdegi birlesken jumys úshin alǵys bildirip, korporasııa basshylyǵynan bul baǵyttaǵy is-sharalardy kúsheıtýdi surady.
2025 jyldyń basynan beri QR Mádenıet jáne aqparat mınıstrliginiń júrgizgen monıtorıng nátıjesinde el zańnamasynyń 7 689 ret buzylǵany anyqtaldy. Anyqtalǵan quqyq buzýshylyqtardyń ishinde Facebook jelisine – 3 027, al Instagram platformasyna – 4 662 jaǵdaı tıesili.
Sonymen qatar, mınıstrlikpen tyǵyz yntymaqtastyq ornatqan Meta kompanııasy Facebook-taǵy zańǵa qaıshy kontenttiń 90%-yn, al Instagram-daǵy 51%-yn joıǵany atap ótildi.
Aıda Balaeva onlaın platformalarda jalǵan jarnamanyń belsendi túrde kóbeıip jatqanyna erekshe alańdaýshylyq bildirdi.
«Mundaı tızerlik jarnamanyń derekkózi naqty kórsetilmeıdi, sondyqtan oǵan der kezinde den qoıý múmkin bolmaı tur», dedi mınıstr.
Sondaı-aq, WhatsApp messendjerine de jeke toqtalyp ótti. Búginde ol da alaıaqtyq jáne jalǵan aqparat taratý quralyna aınalyp otyr.
Aıda Balaeva Meta ókilderinen atalǵan máseleler boıynsha tehnıkalyq sheshimder usynýdy jáne platformalardaǵy kontent moderasııasyn kúsheıtýdi surady. Kezdesý qorytyndysy boıynsha taraptar kórsetilgen máselelerdi sheshýge baǵyttalǵan arnaıy jumys tobyn qurýǵa kelisti. QR Mádenıet jáne aqparat mınıstrligi men Meta kompanııasy Qazaqstan aqparattyq keńistiginiń qaýipsizdigin qamtamasyz etý úshin qajetti sharalardy qabyldaıtynyn jetkizdi.
Sonymen qatar, Mádenıet jáne aqparat mınıstrligi qazaqstandyqtarǵa ınternettegi saqtyq sharalaryn saqtaý qajettigin eskertedi. Esh jerge jeke derekterdi jarııalamaýǵa, aqparat kózderin tekserýge, senimdi qupııasózderdi qoldanýǵa, jiberilgen habarlamalarǵa muqııat bolýǵa jáne kúmándi áreket týraly habarlaýǵa shaqyrady.
