Foto: qazaly.kz
Prezıdent óz sózinde sońǵy birneshe jylda Qazaqstanda aýqymdy ekonomıkalyq jáne ınstıtýsıonaldyq reformalar júrgizilgenin atap ótti.
«Bizdiń maqsatymyz aıqyn – barynsha ártaraptandyrylǵan, ınklıýzıvti jáne keleshekke baǵdarlanǵan ekonomıka qurý. Ekonomıkalyq ósim ornyqty bolýmen qatar, onyń ıgiligi ár azamatqa ádil bólinýge tıis.
Elimizdi túbegeıli jańǵyrtyp, Ádiletti Qazaqstannyń negizin qalaý úshin memlekettilikti nyǵaıtýǵa kóp kúsh-jiger jumsap jatyrmyz. Jalpyulttyq referendým arqyly Konstıtýsııamyzǵa ózgeris engizilip, basty bılik ınstıtýttaryna reforma jasaldy. Biz sýperprezıdenttik júıeden bas tarttyq. «Kúshti Prezıdent – yqpaldy Parlament – esep beretin Úkimet» qaǵıdasyn basshylyqqa alatyn, tejeý men tepe-teńdik júıesi bar prezıdenttik respýblıka jolyn tańdadyq. Bul tujyrym Qazaqstandaǵy saıası júıeniń erekshelikterine meılinshe laıyqty model ekenine kámil senemin.
Prezıdent ókilettiligi bir rettik 7 jyldyq merzimmen shekteldi. Mundaı sheshim buryn-sońdy qabyldanbaǵan. Meniń oıymsha, bul qadam elimizdiń saıası júıesin nyǵaıtýǵa, ekonomıkasyn damytýǵa jáne órkenıetti qoǵam qurýǵa negiz bolady. Prezıdent – halyqtyń belgili bir merzimge, bizdiń jaǵdaıymyzda jeti jylǵa jaldaǵan menedjeri», dedi Memleket basshysy.
Qasym-Jomart Toqaev Parlament azamattyq qoǵam jáne jańa saıası partııalardyń múshelerimen tolyǵyp, áıelderge, jastarǵa jáne áleýmettik turǵydan osal toptyń ókilderine qosymsha kvota berilgenin jetkizdi.
«Adam quqyqtaryn qorǵaýdyń naqty tetikteri bolmasa, ilgeri jyljý múmkin emes. Bul júıe «Zań men tártip» qaǵıdatynda kórinis tapqan. Biz atalǵan reformalardy geosaıası ahýal turaqsyz kezeńde qolǵa alǵanymyzdy bilemiz. Biraq «Jol muraty – jetý». Osy strategııalyq baǵdarymyzdan aınymaımyz, reformalardy toqtatpaımyz. Jahandaǵy syn-qaterlerge qaramastan, ekonomıkamyz byltyr 5,1 paıyzǵa ósti. Shetelden tartylǵan tikeleı ınvestısııanyń kólemi rekordtyq kórsetkishke jetti. Transkaspıı halyqaralyq kólik baǵytymen tasymaldanǵan júk 62 paıyzǵa artty. Deıturǵanmen bizdiń strategııalyq muratymyz sıfrmen ǵana ólshenbeıdi. Bul reformalar jurtshylyqtyń órkendeýine jol ashatyn jańa qoǵamdyq kelisimdi ornatýdy kózdeıdi», dedi Q.Toqaev.
