Tuńǵyshbaı Muqan – Aqtoǵaı aýdanyndaǵy mádenıet pen óner salasynyń damýyna zor úles qosqan tulǵa. Zeınetke shyqqannan keıin óńir tarıhyn túgendep, ólketaný baǵytynda birneshe kitapty jaryqqa shyǵardy. Aqtoǵaıdyń ensıklopedııasyn da jasaýǵa eseli eńbegin qosty.
Jańa jınaqta qanshama jyl jasaǵan zertteýler men izdenisteri bar. Keshti Mádenıet salasynyń úzdigi Nurlan Kúlshikenov tizgindedi.
Kitaptyń tusaýkeserine Májilis depýtaty Qudaıbergen Beksultanov, áskerı qaıratker, zapastaǵy polkovnık Amangeldi Jantasov arnaıy qatysyp, lebizderin bildirdi. Qudaıbergen Beksultanov Tuńǵyshbaı Muqanǵa kúmispen kúptelgen qamshy syılady.
– Biz Tuńǵyshbaı aqsaqaldy erekshe qurmetteımiz. Ol áli kúnge deıin eli úshin aıanbaı eńbektenip júr. Ásirese jas urpaqqa qajetti qasterli topyraǵynyń tarıhyn laıyqty tórine shyǵara bildi. Sizdi oblystyq máslıhattyń depýtaty bolyp júrgen kezden tanımyn. Ár iste ulttyń ıgiligin oılap turasyz. Sonyńyz tizgin ustaǵan azamattarǵa úlgi bolsa eken, – dedi Qudaıbergen Beksultanov.
Oblystyq mádenıet, arhıvter jáne qujattama basqarmasynyń basshysy Ǵalymjan О́telbaıulynyń quttyqtaý haty oqyldy. Basqarma basshysy Tuńǵyshbaı Muqan shyǵarmashylyǵy urpaq úshin qundy mura bolatynyna senim bildirgen.
Keshte Tuńǵyshbaı Muqannyń Súıindik Janysbaı, Oralbek Júnisuly sekildi belgili qalamdastary da tóbe kórsetti. Kesh sońynda áıgili «Toqyraýyn tolqyndarynyń» ónerpazdary ánnen shashý shashty.
Qaraǵandy oblysy
