Foto: gov.kz
Tekserý nátıjesinde 66 mekteptiń 65-i sanıtarııalyq-epıdemıologııalyq talaptardy óreskel buzǵany belgili boldy. Olarǵa 18 mln teńgeden astam somaǵa 57 aıyppul salynyp, 60 uıǵarym berildi. 62 qyzmetker jumystan shettetilip, 1 materıal sotqa jiberildi.
Anyqtalǵan negizgi zańbuzýshylyqtar:
- sanıtarııalyq-epıdemıologııalyq qorytyndysyz jumys isteý;
- qujatsyz nemese merzimi ótken ónimderdi paıdalaný;
- ystyq sýdyń bolmaýy;
- sanıtarııalyq rejımniń saqtalmaýy;
- medısınalyq tekserýden ótpegen jáne densaýlyǵy kúndelikti baqylaýǵa alynbaǵan qyzmetkerlerdiń jumysqa jiberilýi;
- bakterııa tasymaldaýshylardyń (dızenterııa, stafılokokk) anyqtalýy;
- ydys-aıaq pen qural-saımandardy durys jýmaý (shaıyndylardyń 7,2%-ynan ishek bakterııalary tabylǵan).
Oblystyń sanıtarııalyq-epıdemıologııalyq baqylaý departamentine profılaktıkalyq jáne túsindirý jumystaryn kúsheıtý, al bilim basqarmasyna mektep ashanalaryn sanıtarııalyq talaptarǵa sáıkestendirý, sondaı-aq tamaqtaný qyzmetterin jetkizýshilerge qoıylatyn talaptardyń oryndalýyn turaqty tekserýdi qamtamasyz etý tapsyryldy. Sonymen qatar mektepterdiń brakerajdyq komıssııalarynyń jumysyn jandandyrý usynyldy.
Densaýlyq saqtaý basqarmasyna qyzmetkerlerdiń jeke medısınalyq kitapshalarynyń zańnama talaptaryna sáıkes berilýin jáne medısınalyq tekserýlerdiń tolyq kólemde júrgizilýin qatań baqylaý júkteldi.
Búgin Sanıtarııalyq-epıdemıologııalyq baqylaý komıteti tóraǵasynyń orynbasary Roza Qojapova Mańǵystaý oblysynyń aktıvi aldyndaǵy keńeste sóılegen sózinde:
«Tekserý qorytyndylary mekteptegi tamaqtanýdy uıymdastyrýdyń sapasy men jergilikti atqarýshy organdardyń tarapynan baqylaýdyń jetkiliksizdigin kórsetedi. Munaıly aýdanynda ótken jyly 459 oqýshynyń jappaı ýlanǵanyna qaramastan zań buzýshylyqtar áli de qaıtalanyp otyr. Bul mektep ákimshiligi men bilim berý organdarynyń balalardyń qaýipsizdigine formaldy qaraıtynyn bildiredi», dep atap ótti.
Qazir Mańǵystaý oblysynda epıdemıologııalyq jaǵdaı turaqty. 2024 jyldyń naýryz aıynan bastap 18 jasqa deıingi balalardy qyzylshaǵa, qyzamyqqa jáne epıdemııalyq parotıtke (QQP) qarsy ımmýndaý kórsetkishi 83,9%-dy quraǵan.
Alına QAIRATQYZY, EUÝ stýdenti
