Foto: ashyq derekkóz
1 qyrkúıekten bastap mektepterde jańa tamaqtaný standarty men kóp nusqaly tıptik mázir kúshine enedi. Osy erejege sáıkes, shaǵyn jınaqtalǵan, ashana men tamaq blogy joq bilim berý mekemelerinde balalarǵa ystyq sendvıch, ashytylǵan sút ónimderi (mysaly, ıogýrt), maýsymdyq jemister jáne sýsyndar (sút, aıran, ıtmuryn sýsyny, keptirilgen jemister men jıdekterden jasalǵan) usynylatyn arnaıy túski as paketteri daıyndalady.
Mınıstrlik sondaı-aq mektep ákimshilikterin, medısına qyzmetkerlerin, tamaqtaný qyzmetin jetkizýshilerdi jáne brakeraj komıssııasynyń múshelerin jańa standart boıynsha onlaın oqytýdan ótkizip jatqanyn habarlady. Sonymen qatar, mektepke deıingi balalar uıymdarynyń qyzmetkerleri úshin de arnaıy oqý baǵdarlamalary josparlanǵan.
Jańa standartqa sáıkes, tamaq ónimderindegi qant, tuz jáne maı mólsheri azaıtylyp, tabıǵı emes, sondaı-aq shamadan tys tuzdy nemese qantty taǵamdar mektep mázirinen alynyp tastalady. Onyń ornyna jańa pisken kókónister, jemister men tabıǵı ıngredıentterdiń úlesi artady. 1 qyrkúıekten bastap mektepterde kremi bar táttiler, gambýrger, hot-dog, pıssa jáne basqa da zııandy taǵam ónimderi satylmaıdy.
Bul sharalar balalardyń durys tamaqtanýyn qamtamasyz etý jáne olardyń densaýlyǵyn qorǵaý maqsatynda qabyldanyp otyr.
Janel TО́LEÝBEKOVA, EUÝ stýdenti
