Foto: Astana qalasynyń ákimdigi
Qala ákimdiginiń habarlaýynsha, jańa quramdar Qytaıdyń Tanshan qalasyndaǵy zaýytta óndirilgen. Olar avtokólikpen Qytaı men Qazaqstan arqyly ótetin 5300 shaqyrymnan asatyn marshrýt boıynsha tasymaldanyp, elordaǵa on kún ishinde jetkizilgen.
«Uzyndyǵy 60 metrlik jyljymaly quramdar GOA 4 deńgeıindegi avtomattandyrylǵan baǵdarlamalyq-apparattyq keshenmen jabdyqtalǵan, ol kelesi fýnksııalardy qamtamasyz etedi: esikterdiń avtomatty túrde ashylyp-jabylýy, toqtaý jáne jyldamdatý, depoǵa kirý jáne shyǵý, quramdardyń jaǵdaıyn baqylaý, sondaı-aq poıyzdar arasyndaǵy qashyqtyqty qadaǵalaý. Quramdar tolyqtaı avtomattandyrylǵan, basqarý júıesi júrgizýshisiz júzege asyrylady jáne operatorlar tarapynan únemi baqylaýda bolady. Atalǵan quramdardy óndirý barysynda zamanaýı, jeńil jáne berik materıaldar qoldanyldy. Bul sheshim jolaýshylarǵa qolaıly dınamıkalyq sıpattamalar men joǵary deńgeıdegi akýstıkalyq jaılylyqty qamtamasyz etýge baǵyttalǵan», delingen habarlamada.
Jyljymaly quramdardyń tehnıkalyq sıpattamalary:
- Uzyndyǵy – 59,97 m;
- Eni – 2,8 m;
- Bıiktigi – 3,8 m;
- Qýat kózi: úshinshi rels, 750 V;
- Syıymdylyǵy – 600-den astam jolaýshy;
- Eń joǵary jyldamdyǵy – 80 km/saǵ;
- Ortasha paıdalaný jyldamdyǵy – 39,5 km/saǵ;
- Salmaǵy – 94 tonna (jolaýshylarsyz).
Jańa poıyzdar zamanaýı, jeńil ári berik materıaldardan jasalǵan, bul jolaýshylarǵa joǵary deńgeıdegi akýstıkalyq jáne dınamıkalyq jaılylyqty qamtamasyz etedi.
Aıta keteıik, vagondardy satyp alý jáne tasymaldaý jumystary EPC-kelisimshart aıasynda júzege asyrylǵan, ıaǵnı bul úshin el bıýdjetinen bólek qarajat bólinbegen.
