Osyndaı qońyrqaı tirshilik keship jatqan aýylda kún jylyna sala jóndeý jumystary qolǵa alyndy. Sáýirdiń sońynda Terisaqqan – Qoskól baǵytyndaǵy aýdandyq dárejedegi 45 shaqyrymdyq tasjolda aǵymdaǵy jóndeý jumystary bastaldy. Jol jóndeýge aýdandyq bıýdjetten 52 mln teńge bólingen. Jaýapty merdiger – «Constructive Stroy KZ» JShS.
Qazir qyzý jumys júrip jatyr. Negizinen joldyń alasa bólikterin kóterý, qosymsha sýaǵarlar qoıý jáne jańbyr kezinde batpaq bolatyn jol bólikterine ezilmeıtin materıal tóseý jumystary júrgizilmek. Byltyrǵy sý tasqynynda shaıylyp ketken jerlerdi qalpyna keltirý óte mańyzdy.
Taýly aımaq bolǵan soń, jol jóndeý máselesi de kúrdeli. Munda Tobylǵy saı jáne Aqtan saı degen saılar bar. Tobylǵy saıdaǵy eki saıdyń ortasy – 3 shaqyrym, Aqtan saıdyń arasy – 5 shaqyrym. Osy saılardy qysta únemi qar basyp qalady. Saldarynan eki saıdyń ortasynda kólikter qar tutqynyna jıi túsip jatady. Qazir tehnıkanyń bári osy jerlerdi bıiktetý jumysyna jumyldyrylǵan. Bir saıdyń ózine kem degende 300 KamAZ-dan artyq topyraq tógiledi.
«Kúrdeli jerlerge kóp kóńil bólip jatyrmyz. Qoldanystaǵy grıder joldyń eni keı jerde – 9 metr, keı tusy 12 metrge deıin barady. Grıder otyrǵan. Saı tereńdeı beredi. Sony teńestirýge kóp qarjy, tehnıka, topyraq kerek», deıdi Terisaqqan aýyldyq okrýginiń ákimi Jantóre Ǵazızuly.
Kósheni jaryqtandyrý jumysy da nazarda. Osy baǵytta aýyldyń kireberis Jeldiadyr, Ulytaý, Sheńber kóshelerine 46 dana jaryq baǵany ornatyldy. Aýdandyq bıýdjetten 11 mln teńge bólinip, bul jaýapty jumysty Shymkent qalasynyń «Qýanysh Raı» merdigeri moınyna alǵan.
Ulytaý oblysy
