Ásirese qaýip-qater jaǵdaıynda – áskerı is-qımyldarda, tótenshe jaǵdaılarda jáne lańkestikke qarsy operasııalarda medısınalyq kómek kórsetetinder úshin erekshe mánge ıe. Sol sebepti Ulttyq ulan qurylymynda 2025 jylǵy mańyzdy bastamanyń biri – taktıkalyq medısına qyzmetin qurý boldy.
Taktıkalyq medısına – shuǵyl jaǵdaılarda, sanaýly mınýttar sheshýshi ról atqaratyn kezde, dástúrli azamattyq medısınanyń tásilderi tıimsiz bolatyn sátterde kómek kórsetý júıesi. Jalpyǵa málim, IIM Ulttyq ulanynyń áskerı qyzmetshileri qoǵamdyq qaýipsizdikti qamtamasyz etýge, arnaıy operasııalarǵa, lańkestikke qarsy is-sharalarǵa, tabıǵı apattar men tótenshe jaǵdaılardyń saldaryn joıýǵa qatysady. Mundaı jaǵdaıda kásibı medısına mamandary kelgenge deıin alǵashqy medısınalyq kómekti jedel ári saýatty kórsete bilý asa mańyzdy.
Ulttyq ulanda taktıkalyq medısınalyq daıyndyq Tactical Combat Casualty Care (TCCC) halyqaralyq standarty boıynsha júrgiziledi. Bul – urys jaǵdaıynda jaraqat alǵandarǵa kómek kórsetý hattamasy. Ol quqyqtyq tártip áskerleriniń mindetterine beıimdelgen jáne úsh negizgi kezeńnen turady:
Care Under Fire – oq astynda kómek kórsetý (qan toqtatatyn tańǵyshtar salý, qaýipsizdikti qamtamasyz etý);
Tactical Field Care – dala jaǵdaıynda kómek kórsetý (qan ketýdi toqtatý, tynys alýdy qalpyna keltirý, jaǵdaıdy turaqtandyrý);
Tactical Evacuation Care – evakýasııa kezinde kómek (medısınalyq mekemege deıin súıemeldeý jáne kómek kórsetý).
Oqytý arnaıy oqý ortalyqtarynda ótkiziledi. Baǵdarlama teorııalyq sabaqtarmen qatar, jaýyngerlik jaraqattar men tótenshe jaǵdaı ssenarıılerin naqty modeldeıtin zamanaýı trenajerlarda praktıkalyq jattyǵýlardy qamtıdy.
Taktıkalyq medısınalyq daıyndyq – bir rettik shara emes, ol quqyqtyq tártip áskerin jańǵyrtýǵa baǵyttalǵan uzaqmerzimdi strategııalyq qadam. Onyń maqsaty – áskerı bólimderdiń jaýyngerlik qabiletin arttyrý, jeke quram arasyndaǵy adam shyǵynyn azaıtý jáne áskerı ortada medısınalyq saýattylyq mádenıetin qalyptastyrý.
Buǵan qosa, IIM Ulttyq ulanynyń patrýldik qyzmet atqaratyn áskerı qyzmetshileriniń árqaısysy alǵashqy medısınalyq kómektiń bazalyq daǵdylaryna úıretiledi. Bul jaýynger jaraqat alǵan sátte nemese beıbit turǵyn zardap shekken jaǵdaıda, kásibı medısına mamandary kelgenge deıin durys áreket ete bilý úshin qajet.
Taktıkalyq medısına nusqaýshylary oqý-jattyǵý sabaqtaryn únemi ótkizip turady, onyń ishinde shynaıy jaǵdaıǵa barynsha jaqyn ortada dalalyq jattyǵýlar uıymdastyrylady. Bul –áskerı qyzmetshilerdiń kúızeliske tózimdiligin arttyryp, óziniń ne ózgeniń ómirine tóngen qaýipke shuǵyl áreket etýdi úırenýge múmkindik beredi.
