Foto: triathlonorgkz
Elıta sanaty úshin standartty olımpıadalyq qashyqtyq qoldanyldy: 1500 m júzý, 40 km velojarys jáne 10 km júgirý, al jasóspirimder men qyzdar úshin – sprınterlik qashyqtyq: 750 m júzý, 20 km velokezeń jáne 5 km júgirý.
Elıta, erler: Qazaqstan atynan qatysqan Daryn Qonysbaev jeńimpaz atandy. Ol barlyq kezeńde turaqty óner kórsetip, máre syzyǵynda qarqyndy fınısh jasap, nátıjesinde — 1:46:28 ýaqyt kórsetkishimen Roman Mınevti (Reseı) jáne Tıl Krampty (Germanııa) basyp ozdy. Ekinshi jáne úshinshi oryndardy tıisinshe osy sportshylar ıelendi.
Jasóspirim qyzdar: Altyn medaldy otandasymyz Dıana Erjanova jeńip aldy – 1:08:20. Kúmis – Dıana Bıktımırova (О́zbekstan), al qola medal – Anel Isabaevaǵa (Qazaqstan) buıyrdy. Ol 1:10:54 nátıjesimen máre syzyǵyn kesip, sońǵy júgirý kezeńinde tabandylyq pen tózimdilik tanytty.
Jasóspirim erler: Qazaqstan sportshylary tolyq podıýmdy ıelendi:
Elmurat Qanaı – 59:57 (altyn), Ilıa Krýpıakov – 1:00:05 (kúmis), Ramazan Aınegov – 1:00:21 (qola).
Bul komandalyq jetistik eldegi jas trıatletter mektebiniń júıeli jáne sapaly daıyndyǵyn kórsetedi.
15 maýsymda ótken áýesqoılar jarysyna Qazaqstannyń túkpir-túkpirinen 150-den astam qatysýshy jınaldy. Federasııa vıse-prezıdenti Qaıyrgeldi Jandos:
«Býrabaıdaǵy jarys World Triathlon kúntizbesindegi mańyzdy kezeńge aınaldy. Kólder men qaraǵaıly ormandar aıasyndaǵy kórkem marshrýttar sportshylar úshin erekshe jaǵdaı jasady. Aýa raıynyń qubylmaly bolýyna qaramastan, jarys shynaıy sport merekesine aınalyp, kásibı jáne áýesqoı sportshylardy biriktirdi», dedi.
Býrabaıdaǵy jarys – Qazaqstan trıatlon sporty úshin úlken jetistik. Ártúrli jas sanattary men qashyqtyqtarda qol jetkizilgen jeńister – elimizdegi sport damýynyń joǵary deńgeıin dáleldeıdi. Týrnır joǵary uıymdastyrý deńgeıinde ótti jáne ol sporttyq dostyq pen halyqaralyq yntymaqtastyqtyń nyshany boldy.
Aıta ketelik, jarystyń bas demeýshisi «ERG Kómek» korporatıvtik qory, al uıymdastyrýshylary: Týrızm jáne sport mınıstrligine qarasty Sport jáne dene shynyqtyrý isteri komıteti, «Sportty damytý dıreksııasy» RMK, «Qazaqstan trıatlon federasııasy» QB, Aqmola oblystyq trıatlon federasııasy.
